Mal bordaqylaýda Sairam aýdany sharýalary alda keledi
«Eńbeksiz bereke joq, eńbekte mereke kóp». Búginde Sairam aýdanynyń eńbekkerleri berekeden de, merekeden de kende emes. Óitkeni, adal eńbek etip, jetistikterge jetip jatqan jaǵdaiy bar. Aýdan halqy negizinen aýylsharýashylyǵymen ainalysady. Jer jyrtyp egin egedi, qorada mal bailaidy. Sharýashylyqtaryn damytý maqsatynda mikro qarjy uiymdarynan tómendetilgen paiyzben nesie alyp jatqandardyń da deni Sairam aýdanynyń turǵyndary.
Salany damytýǵa arnalǵan memlekettik baǵdarlamalar men nesielik jeńildikterdi utymdy paidalanyp kele jatqan sairamdyq sharýalar mal bordaqylaý men sút saýý aýlalaryn kóptep ashyp, iske qosyp jatyr.
Máselen, jyl basynan beri aýdanda 73 birlik 10-15 bastyq shaǵyn mal bordaqylaý orny ashylǵan. Al, aýdandaǵy jalpy sany 913 mal bordaqylaý alańynda bir mezette 32-33 myń bas mal bordaqylanyp jatyr.
Jalpy, ótken jyldyń sáikes kezeńimen salystyrǵanda Sairam aýdanynda iri qara mal basy 25,4 paiyzǵa, jylqy 14,3 paiyzǵa, qoi men eshki 19,3 paiyzǵa artqan. Olardan 2018 jyldyń basynan beri tiri salmaqta 15,895 myń tonna et, 75 myń tonna sút jáne 9,479 mln.dana jumyrtqa óndirilgen.
Osylaisha, aýdannyń damý kontseptsiiasynda aýyl sharýashylyǵy salasy boiynsha 2018 jylǵa josparlanǵan 6 jobanyń 4 jobasy iske asyp otyr.
Tynymsyz eńbektiń nátijesi bolsa kerek, 2017 jyly aýdannyń aýylsharýashylyǵy salasynda 58,8 mlrd. teńgeniń ónimi óndirildi.
Elbasynyń «100 naqty qadam – Ult josparyndaǵy» 60-61 qadamynda et jáne sút ónimderin óndirý, olardy jańa tehnologiialar negizinde qaita óńdeý kólemin arttyrý aitylǵan. Al, 2021 jylǵa qarai aýdandaǵy qaita óńdeý kásiporyndary óndirilgen ónimderdiń óńdeý úlesin, máselen, et óńdeýdi 21 paiyzǵa, sút óńdeýdi 23 paiyzǵa, kókónis-jemis óńdeýdi 46 paiyzǵa jetkizý josparlap otyr.
Sairam aýdany ákiminiń baspasóz qyzmeti
