«ەڭبەكسىز بەرەكە جوق، ەڭبەكتە مەرەكە كوپ». بۇگىندە سايرام اۋدانىنىڭ ەڭبەككەرلەرى بەرەكەدەن دە، مەرەكەدەن دە كەندە ەمەس. ويتكەنى، ادال ەڭبەك ەتىپ، جەتىستىكتەرگە جەتىپ جاتقان جاعدايى بار. اۋدان حالقى نەگىزىنەن اۋىلشارۋاشىلىعىمەن اينالىسادى. جەر جىرتىپ ەگىن ەگەدى، قورادا مال بايلايدى. شارۋاشىلىقتارىن دامىتۋ ماقساتىندا ميكرو قارجى ۇيىمدارىنان تومەندەتىلگەن پايىزبەن نەسيە الىپ جاتقانداردىڭ دا دەنى سايرام اۋدانىنىڭ تۇرعىندارى.
سالانى دامىتۋعا ارنالعان مەملەكەتتىك باعدارلامالار مەن نەسيەلىك جەڭىلدىكتەردى ۇتىمدى پايدالانىپ كەلە جاتقان سايرامدىق شارۋالار مال بورداقىلاۋ مەن ءسۇت ساۋۋ اۋلالارىن كوپتەپ اشىپ، ىسكە قوسىپ جاتىر.
ماسەلەن، جىل باسىنان بەرى اۋداندا 73 بىرلىك 10-15 باستىق شاعىن مال بورداقىلاۋ ورنى اشىلعان. ال، اۋدانداعى جالپى سانى 913 مال بورداقىلاۋ الاڭىندا ءبىر مەزەتتە 32-33 مىڭ باس مال بورداقىلانىپ جاتىر.
جالپى، وتكەن جىلدىڭ سايكەس كەزەڭىمەن سالىستىرعاندا سايرام اۋدانىندا ءىرى قارا مال باسى 25،4 پايىزعا، جىلقى 14،3 پايىزعا، قوي مەن ەشكى 19،3 پايىزعا ارتقان. ولاردان 2018 جىلدىڭ باسىنان بەرى ءتىرى سالماقتا 15،895 مىڭ توننا ەت، 75 مىڭ توننا ءسۇت جانە 9،479 ملن.دانا جۇمىرتقا وندىرىلگەن.
وسىلايشا، اۋداننىڭ دامۋ كونسەپسياسىندا اۋىل شارۋاشىلىعى سالاسى بويىنشا 2018 جىلعا جوسپارلانعان 6 جوبانىڭ 4 جوباسى ىسكە اسىپ وتىر.
تىنىمسىز ەڭبەكتىڭ ناتيجەسى بولسا كەرەك، 2017 جىلى اۋداننىڭ اۋىلشارۋاشىلىعى سالاسىندا 58،8 ملرد. تەڭگەنىڭ ءونىمى ءوندىرىلدى.
ەلباسىنىڭ «100 ناقتى قادام – ۇلت جوسپارىنداعى» 60-61 قادامىندا ەت جانە ءسۇت ونىمدەرىن ءوندىرۋ، ولاردى جاڭا تەحنولوگيالار نەگىزىندە قايتا وڭدەۋ كولەمىن ارتتىرۋ ايتىلعان. ال، 2021 جىلعا قاراي اۋدانداعى قايتا وڭدەۋ كاسىپورىندارى وندىرىلگەن ونىمدەردىڭ وڭدەۋ ۇلەسىن، ماسەلەن، ەت وڭدەۋدى 21 پايىزعا، ءسۇت وڭدەۋدى 23 پايىزعا، كوكونىس-جەمىس وڭدەۋدى 46 پايىزعا جەتكىزۋ جوسپارلاپ وتىر.
سايرام اۋدانى اكىمىنىڭ باسپا ءسوز قىزمەتى
