Májiliste qamtamasyz etilmegen sıfrlyq aktıvter arqyly qarjylyq operasıalar júrgizgenderdi jazalamaý usynyldy. Óıtkeni sońǵy kezderi sıfrlyq maınerlerdiń ekonomıkadaǵy belsendiligi kúrt tómendegen. Ásirese, lısenzıalaý engizilgennen keıin atalǵan naryq áldeqaıda "órkenıetti" kúıge keltirilgenimen, kólemi tórt esege bir-aq qysqarǵan. Bul týraly búgin Úkimetke joldaǵan depýtattyq saýalynda Ekaterına Smyshláeva aıtty, dep habarlaıdy Dalanews.kz.
"Sıfrlyq aktıvter salasy qarajatty jylystatýda ońtaıly paıdalanylýda. Zańsyz aıyrbastaý operasıalary boıynsha birqatar qylmystyq isterde óndirip alynatyn soma 5-6 mlrd teńgege deıin jetip jatady, biraq olardyń barlyǵy búdjetke kelip túspeıtini anyq. Shyn máninde, naqty merzimnen bólek sottalǵandar ómir boıyna ekonomıkalyq jazaǵa ushyraıdy. Mundaı jaǵdaılar áleýetti buzýshylardy ǵana emes, sonymen qatar naryqtyń adal qatysýshylaryn da úrkitýde. Sondyqtan jeke tulǵalar úshin qamtamasyz etilmegen sıfrlyq aktıvterdiń aınalymyn qylmystyq qýdalaýdan bosatýdy, kerisinshe operatorlardyń qyzmetin baqylaýdy kúsheıtýdi usynamyn", - dedi ol.
Sonymen qatar depýtat elmizdege tájirıbesi joq ınvestorlar úshin lısenzıalanǵan krıpto almastyrý oryndaryn qurýdy usynady.
"Qazaqstandyq paıdalanýshylardyń jahandyq krıptobırjalardan lısenzıalanǵan otandyq alańdarǵa ótýin qamtamasyz etý qajet. Sıfrlyq naryqqa qatysýshylarǵa qatysty sanksıalardyń mólsherin qysqartyp, qylmystyq quqyq buzýshylyqtardyń quramyn qaıta qaraýdy usynamyz. Maınıngtik kompanıalardy ınvestısıalyq jobalarǵa, ásirese sıfrlyq ınfraqurylym jáne energetıka salalaryna tartý kerek. Osy salany basqarý fýnksıalaryn bólip qarastyrý qajet. DAO, DeFi jáne aktıvterdi tokenızasıalaýdy qosa alǵanda, jańa modelderdi synaý úshin eksperımenttik quqyqtyq rejımderdi paıdalanýdy keńeıtý de usynylady", – deıdi Smyshláeva.
Ol keıbir depýtattar zańnamaǵa engizýdi qajet etetin ózgertýler boıynsha shuǵyl jáne júıeli usynystar paketin daıyndap qoıǵanyn atap ótti.
"Jalpy AHQO krıptobırjalary sheńberinde ǵana sıfrlyq aktıvterdiń zańdy aınalymyn shekteý ınfraqurylymnyń damýyn báseńdetti. Jyldyq aınalymdaǵy 15,5 mlrd-tyń tek 1,4 mlrd (9%) dollary AHQO bırjalarynda, al qalǵany kóleńkeli aımaqta bolyp tabylady. Lısenzıalanǵan alańdar uzaq ýaqyt boıy tutynýshylardy syrtqy resýrstarǵa baǵyttaı otyryp, ónim jelisin keńeıte qoımady. Bul rette jahandyq bırjalarǵa tyıym salyndy. Kóptegen paıdalanýshylar bilikti ınvestorlar emes jáne resmı bırjalarda jumys isteı almaıdy, bul olardyń zańsyz aıyrbasqa júginýine ıtermeleıdi. Nátıjesinde aınalymdy oqshaýlaý naryqtyń ósimi men ashyqtyǵy úshin tym tar keńistikke aınaldy", - dep sózin túıindeıdi depýtat.
Buǵan deıin saıtymyzda "Dollardan bereke ketip, krıptoǵa suranys artýy múmkin". Sarapshy Tramptyń ne oıy baryn aıtty" degen maqala jarıalanǵan bolatyn. Sondaı-aq atalǵan taqyrypta "1,5 mln qazaqstandyq krıptovalútanyń kóleńkeli naryǵynda júr. Ulttyq bank ne usynady" degen materıaldy da oqı otyryńyzdar. 2025 jyly 13 naýryzda 5,6 mıllıard teńge sıfrlyq aktıvterdi zańsyz aınalymyn jasaǵandar ustalǵanyn, olardyń arasynda kámeletke tolmaǵan bala da baryn jazǵanbyz.
