ماجىلىستە قامتاماسىز ەتىلمەگەن سيفرلىق اكتيۆتەر ارقىلى قارجىلىق وپەراسيالار جۇرگىزگەندەردى جازالاماۋ ۇسىنىلدى. ويتكەنى سوڭعى كەزدەرى سيفرلىق ماينەرلەردىڭ ەكونوميكاداعى بەلسەندىلىگى كۇرت تومەندەگەن. اسىرەسە، ليسەنزيالاۋ ەنگىزىلگەننەن كەيىن اتالعان نارىق الدەقايدا "وركەنيەتتى" كۇيگە كەلتىرىلگەنىمەن، كولەمى ءتورت ەسەگە ءبىر-اق قىسقارعان. بۇل تۋرالى بۇگىن ۇكىمەتكە جولداعان دەپۋتاتتىق ساۋالىندا ەكاتەرينا سمىشليايەۆا ايتتى، دەپ حابارلايدى Dalanews.kz.
"سيفرلىق اكتيۆتەر سالاسى قاراجاتتى جىلىستاتۋدا وڭتايلى پايدالانىلۋدا. زاڭسىز ايىرباستاۋ وپەراسيالارى بويىنشا ءبىرقاتار قىلمىستىق ىستەردە ءوندىرىپ الىناتىن سوما 5-6 ملرد تەڭگەگە دەيىن جەتىپ جاتادى، ءبىراق ولاردىڭ بارلىعى بيۋدجەتكە كەلىپ تۇسپەيتىنى انىق. شىن مانىندە، ناقتى مەرزىمنەن بولەك سوتتالعاندار ءومىر بويىنا ەكونوميكالىق جازاعا ۇشىرايدى. مۇنداي جاعدايلار الەۋەتتى بۇزۋشىلاردى عانا ەمەس، سونىمەن قاتار نارىقتىڭ ادال قاتىسۋشىلارىن دا ۇركىتۋدە. سوندىقتان جەكە تۇلعالار ءۇشىن قامتاماسىز ەتىلمەگەن سيفرلىق اكتيۆتەردىڭ اينالىمىن قىلمىستىق قۋدالاۋدان بوساتۋدى، كەرىسىنشە وپەراتورلاردىڭ قىزمەتىن باقىلاۋدى كۇشەيتۋدى ۇسىنامىن"، - دەدى ول.
سونىمەن قاتار دەپۋتات ەلمىزدەگە تاجىريبەسى جوق ينۆەستورلار ءۇشىن ليسەنزيالانعان كريپتو الماستىرۋ ورىندارىن قۇرۋدى ۇسىنادى.
"قازاقستاندىق پايدالانۋشىلاردىڭ جاھاندىق كريپتوبيرجالاردان ليسەنزيالانعان وتاندىق الاڭدارعا ءوتۋىن قامتاماسىز ەتۋ قاجەت. سيفرلىق نارىققا قاتىسۋشىلارعا قاتىستى سانكسيالاردىڭ مولشەرىن قىسقارتىپ، قىلمىستىق قۇقىق بۇزۋشىلىقتاردىڭ قۇرامىن قايتا قاراۋدى ۇسىنامىز. ماينينگتىك كومپانيالاردى ينۆەستيسيالىق جوبالارعا، اسىرەسە سيفرلىق ينفراقۇرىلىم جانە ەنەرگەتيكا سالالارىنا تارتۋ كەرەك. وسى سالانى باسقارۋ فۋنكسيالارىن ءبولىپ قاراستىرۋ قاجەت. DAO، DeFi جانە اكتيۆتەردى توكەنيزاسيالاۋدى قوسا العاندا، جاڭا مودەلدەردى سىناۋ ءۇشىن ەكسپەريمەنتتىك قۇقىقتىق رەجيمدەردى پايدالانۋدى كەڭەيتۋ دە ۇسىنىلادى"، – دەيدى سمىشليايەۆا.
ول كەيبىر دەپۋتاتتار زاڭناماعا ەنگىزۋدى قاجەت ەتەتىن وزگەرتۋلەر بويىنشا شۇعىل جانە جۇيەلى ۇسىنىستار پاكەتىن دايىنداپ قويعانىن اتاپ ءوتتى.
"جالپى احقو كريپتوبيرجالارى شەڭبەرىندە عانا سيفرلىق اكتيۆتەردىڭ زاڭدى اينالىمىن شەكتەۋ ينفراقۇرىلىمنىڭ دامۋىن باسەڭدەتتى. جىلدىق اينالىمداعى 15،5 ملرد-تىڭ تەك 1،4 ملرد (9%) دوللارى احقو بيرجالارىندا، ال قالعانى كولەڭكەلى ايماقتا بولىپ تابىلادى. ليسەنزيالانعان الاڭدار ۇزاق ۋاقىت بويى تۇتىنۋشىلاردى سىرتقى رەسۋرستارعا باعىتتاي وتىرىپ، ءونىم جەلىسىن كەڭەيتە قويمادى. بۇل رەتتە جاھاندىق بيرجالارعا تىيىم سالىندى. كوپتەگەن پايدالانۋشىلار بىلىكتى ينۆەستورلار ەمەس جانە رەسمي بيرجالاردا جۇمىس ىستەي المايدى، بۇل ولاردىڭ زاڭسىز ايىرباسقا جۇگىنۋىنە يتەرمەلەيدى. ناتيجەسىندە اينالىمدى وقشاۋلاۋ نارىقتىڭ ءوسىمى مەن اشىقتىعى ءۇشىن تىم تار كەڭىستىككە اينالدى"، - دەپ ءسوزىن تۇيىندەيدى دەپۋتات.
بۇعان دەيىن سايتىمىزدا "دوللاردان بەرەكە كەتىپ، كريپتوعا سۇرانىس ارتۋى مۇمكىن". ساراپشى ترامپتىڭ نە ويى بارىن ايتتى" دەگەن ماقالا جاريالانعان بولاتىن. سونداي-اق اتالعان تاقىرىپتا "1،5 ملن قازاقستاندىق كريپتوۆاليۋتانىڭ كولەڭكەلى نارىعىندا ءجۇر. ۇلتتىق بانك نە ۇسىنادى" دەگەن ماتەريالدى دا وقي وتىرىڭىزدار. 2025 جىلى 13 ناۋرىزدا 5،6 ميلليارد تەڭگە سيفرلىق اكتيۆتەردى زاڭسىز اينالىمىن جاساعاندار ۇستالعانىن، ولاردىڭ اراسىندا كامەلەتكە تولماعان بالا دا بارىن جازعانبىز.
