Мәжілісте қамтамасыз етілмеген цифрлық активтер арқылы қаржылық операциялар жүргізгендерді жазаламау ұсынылды. Өйткені соңғы кездері цифрлық майнерлердің экономикадағы белсенділігі күрт төмендеген. Әсіресе, лицензиялау енгізілгеннен кейін аталған нарық әлдеқайда "өркениетті" күйге келтірілгенімен, көлемі төрт есеге бір-ақ қысқарған. Бұл туралы бүгін Үкіметке жолдаған депутаттық сауалында Екатерина Смышляева айтты, деп хабарлайды Dalanews.kz.
"Цифрлық активтер саласы қаражатты жылыстатуда оңтайлы пайдаланылуда. Заңсыз айырбастау операциялары бойынша бірқатар қылмыстық істерде өндіріп алынатын сома 5-6 млрд теңгеге дейін жетіп жатады, бірақ олардың барлығы бюджетке келіп түспейтіні анық. Шын мәнінде, нақты мерзімнен бөлек сотталғандар өмір бойына экономикалық жазаға ұшырайды. Мұндай жағдайлар әлеуетті бұзушыларды ғана емес, сонымен қатар нарықтың адал қатысушыларын да үркітуде. Сондықтан жеке тұлғалар үшін қамтамасыз етілмеген цифрлық активтердің айналымын қылмыстық қудалаудан босатуды, керісінше операторлардың қызметін бақылауды күшейтуді ұсынамын", - деді ол.
Сонымен қатар депутат елміздеге тәжірибесі жоқ инвесторлар үшін лицензияланған крипто алмастыру орындарын құруды ұсынады.
"Қазақстандық пайдаланушылардың жаһандық криптобиржалардан лицензияланған отандық алаңдарға өтуін қамтамасыз ету қажет. Цифрлық нарыққа қатысушыларға қатысты санкциялардың мөлшерін қысқартып, қылмыстық құқық бұзушылықтардың құрамын қайта қарауды ұсынамыз. Майнингтік компанияларды инвестициялық жобаларға, әсіресе цифрлық инфрақұрылым және энергетика салаларына тарту керек. Осы саланы басқару функцияларын бөліп қарастыру қажет. DAO, DeFi және активтерді токенизациялауды қоса алғанда, жаңа модельдерді сынау үшін эксперименттік құқықтық режимдерді пайдалануды кеңейту де ұсынылады", – дейді Смышляева.
Ол кейбір депутаттар заңнамаға енгізуді қажет ететін өзгертулер бойынша шұғыл және жүйелі ұсыныстар пакетін дайындап қойғанын атап өтті.
"Жалпы АХҚО криптобиржалары шеңберінде ғана цифрлық активтердің заңды айналымын шектеу инфрақұрылымның дамуын бәсеңдетті. Жылдық айналымдағы 15,5 млрд-тың тек 1,4 млрд (9%) доллары АХҚО биржаларында, ал қалғаны көлеңкелі аймақта болып табылады. Лицензияланған алаңдар ұзақ уақыт бойы тұтынушыларды сыртқы ресурстарға бағыттай отырып, өнім желісін кеңейте қоймады. Бұл ретте жаһандық биржаларға тыйым салынды. Көптеген пайдаланушылар білікті инвесторлар емес және ресми биржаларда жұмыс істей алмайды, бұл олардың заңсыз айырбасқа жүгінуіне итермелейді. Нәтижесінде айналымды оқшаулау нарықтың өсімі мен ашықтығы үшін тым тар кеңістікке айналды", - деп сөзін түйіндейді депутат.
Бұған дейін сайтымызда "Доллардан береке кетіп, криптоға сұраныс артуы мүмкін". Сарапшы Трамптың не ойы барын айтты" деген мақала жарияланған болатын. Сондай-ақ аталған тақырыпта "1,5 млн қазақстандық криптовалютаның көлеңкелі нарығында жүр. Ұлттық банк не ұсынады" деген материалды да оқи отырыңыздар. 2025 жылы 13 наурызда 5,6 миллиард теңге цифрлық активтерді заңсыз айналымын жасағандар ұсталғанын, олардың арасында кәмелетке толмаған бала да барын жазғанбыз.
