Májiliste múgedektigi bar adamdardyń qoǵamdyq uiymdary úshin salyqtyq sharttardy qaita qaraý máselesi kóterildi, dep habarlaidy Dala News.
Májilis depýtaty Erlan Ábdievtiń tóraǵalyǵymen ótken «Inkliýzivti Parlament» depýtattyq tobynyń otyrysynda jańa Salyq kodeksine engizilgen ózgerister keńinen talqylandy. Jiynǵa depýtattarmen qatar ulttyq ekonomika birinshi vitse-ministri Azamat Ámrin, eńbek jáne halyqty áleýmettik qorǵaý, qarjy, ulttyq ekonomika ministrlikteriniń ókilderi, sondai-aq Eńbek resýrstaryn damytý ortalyǵynyń mamandary qatysty.
Otyrysta Erlan Ábdiev jańa Salyq kodeksiniń áleýmettik salmaǵyna erekshe nazar aýdardy. Onyń aitýynsha, 2026 jylǵy 1 qańtardan bastap kúshine enetin ózgeristerge sáikes, salyqtyq jeńildikter alý úshin múgedektigi bar adamdardy jumysqa tartý talaby kúsheitiledi.
«Buǵan deiin jeńildik alǵan uiymdarda nebári eki múgedektigi bar adam jumys istese jetkilikti bolatyn. Al jańa kodekste bul kórsetkish 10 adamǵa deiin ulǵaityldy. Qazir elimizde 740 myń múgedektigi bar adam bar, sonyń 410 myńy eńbekke qabiletti jasta. Alaida olardyń tek 100 myńy ǵana jumyspen qamtylǵan», – dedi depýtat.
Jiyn qorytyndysynda depýtattar Úkimetke sońǵy 10 jylda salyqtyq preferentsiia alǵan iri uiymdarǵa taldaý júrgizý jóninde hattamalyq tapsyrma berýdi usyndy. Atap aitqanda, bul uiymdarda múgedektigi bar adamdardyń naqty qanshasy jumys isteitini jáne memlekettik qoldaýdyń tiimdiligi baǵalanbaq.
Atalǵan taldaý nátijesine qarai Salyq kodeksine qosymsha ózgerister engizý múmkindigi qarastyrylatyn bolady.
