Májilis Qazaqstan Respýblikasynyń jańa Biýdjet kodeksin qabyldap, qujatty Senattyń qaraýyna joldady, dep habarlaidy Dalanews.kz.
Jańa kodeks jobasyn ázirleý Májiliste 2023 jyldyń qyrkúieginde bastalǵan bolatyn. Osy ýaqyt ishinde qujat jumys tobynyń talqylaýlarynan ótip, birqatar túzetýler engizildi.
Kodekstiń basty maqsaty — boljamdaý sapasyn arttyryp, biýdjettiń kiristerin ulǵaitý. Osyǵan orai, ekonomika salalarynyń túsimder kólemine áserin taldaý tártibin retteitin normalar engizildi. Bul normalar shyǵystardyń basym baǵyttaryn aiqyndaýǵa múmkindik beredi. Iaǵni, salalyq memlekettik investitsiialyq jobalardy júzege asyrý týraly sheshimder olardyń ekonomikaǵa áserin (JIÓ-ge qosqan úlesi, biýdjetke túsimderdiń ósýi, investitsiialar kólemi) eskere otyryp qabyldanatyn bolady. Osylaisha, biýdjettik zańnama qarajatty igerýge emes, naqty ekonomikalyq jáne áleýmettik nátijelerge qol jetkizýge baǵyttalady.
Memlekettik organdardyń kiristerdi josparlaý jáne ákimshilendirý boiynsha ókilettikteri naqtylanyp, olardyń ózara árekettestigi kúsheitildi. Bul salyqtyq emes túsimderdi baqylaý, eseptilik júrgizý jáne kirister boiynsha málimetter almasýdy qamtidy. Budan bólek, biýdjettiń oryndalýy týraly jyldyq esepke kirister boiynsha egjei-tegjeili taldamalyq aqparat engizý josparlanǵan (salyqtyq bereshek, aldyn ala tólemder, salyqtyq alshaqtyq negizinde alynǵan kirister jáne t.b.).
Óńirlik biýdjetterdiń kiristeriniń asyra oryndalǵan somalary, eń aldymen, qaryzdardy óteýge jáne gazdandyrý, sýmen jabdyqtaý, jylý jáne elektr jelilerin jańartý, jol jóndeý siiaqty basym jobalardy qarjylandyrýǵa jumsalatyn bolady.
