Májilis depýtattary balalarǵa jáne qamqorlyqty qajet etetin týystaryna qarap, jumysyn qatar atqaratyn ata-analardyń jumys ýaqytyn qysqartýdy usyndy, dep habarlaıdy Dalanews.kz.
Depýtat Ajar Saǵyndyqovanyń aıtýynsha, áıelder kúnine shamamen 13 saǵatyn jumys pen úı sharýasyna jumsaıdy. Bul olardyń sozylmaly sharshaýyna jáne kúızeliske ushyraýyna sebep bolyp otyr.
Usynysqa sáıkes, mundaı azamattarǵa jalaqysy men áleýmettik kepildikterin saqtaı otyryp, qysqartylǵan jumys ýaqytyn zań júzinde bekitý qarastyrylyp jatyr. Sondaı-aq ıkemdi jumys kestesi, qashyqtan jumys isteý múmkindigi jáne kútimge arnalǵan "jyljymaly jumys kestesin" engizý usynyldy.
Depýtat Qaraqat Ábden bul bastamany jeńildik emes, bala bolashaǵy men otbasy turaqtylyǵyna jasalatyn ınvestısıa dep atady. Onyń aıtýynsha, kishkentaı balasy bar ata-analardy qoldaý - strategıalyq mańyzy bar qadam.
Sonymen qatar balalarǵa nemese naýqas týystaryna qaraıtyn ata-analar úshin qysqartylǵan jumys aptasyn engizýge baǵyttalǵan pılottyq joba iske qosylmaq.
