Májilisiniń depýtaty Samat Musabaev Roman Skliardyń jańa Salyq kodeksine qatysty bir top jýrnalist aldynda shimirikpei aitqan ótirigine qatty tań qalǵanyn jetkizdi. Onyń aitýynsha, ol halyqty adastyryp otyr nemese Salyq kodeksiniń tolyq mazmunyn bilmeidi, dep habarlaidy Dalanews.kz.
Aita ketsek, Roman Skliar Úkimettegi brifing barysynda jýrnalisterdiń jańa Salyq kodeksine qatysty qoiǵan suraqtaryna jaýa bere otyryp: "Bul ózgerister qarapaiym halyqqa áser etpeidi" dep salǵan.
"Onyń bul aitqany qoǵamda teris pikir týdyrady. Sebebi naqty jaǵdai múlde basqasha. Skliar osylai dei otyryp, ne shyndyqqa janaspaityn aqparat aityp otyr, iaǵni halyqty adastyryp otyr nemese ol zańdy tolyq oqymaǵan, Salyq kodeksiniń mazmunyn bilmeidi. Al shyn máninde, bul ózgerister qurylys kompaniialaryna eshqandai ziian keltirmeidi. Bul arada zardap shegetin – qarapaiym halyq. Birinshiden, tutynýshylyq shyǵyndar turǵysynan qarasaq, NDS (qosymsha qun salyǵy) mólsheriniń ósýi taýarlar men qyzmetterdiń ózindik qunyn arttyrady. Al bul óz kezeginde halyqtyń satyp alý qabiletiniń tómendeýine, tutyný kóleminiń qysqarýyna ákelýi múmkin. Kerisinshe, NDS (qosymsha qun salyǵy) tómendegen jaǵdaida, bul baǵanyń arzandaýyna, ishki naryqtaǵy tutynýdy yntalandyrýǵa jaǵdai jasar edi. Qurylys salasynda da dál osyndai áser bolady. Úidiń ózindik quny ósedi, biraq bul qurylys kompaniialarynyń paidasyn azaitpaidy. Bar aýyrtpalyq qarapaiym azamattardyń iyǵyna túsedi. Budan ásirese jastar, jas otbasylar, jalǵyzbasty analar jáne áleýmettik osal toptar zardap shegedi.Roman Vasilevich Skliar myrza "iri qurylys kompaniialary endi shekten tys paida tappaidy", - deidi. Biraq shyndyqta olardyń salyqty taýar baǵasyna qosa sata beretini belgili. Qurylys kompaniialary úshin eshteńe ózgermeidi, tek úidiń baǵasy qymbattaidy. Bul - tutynýshy úshin, iaǵni halyq úshin - naqty qiyndyq", dep jazdy depýtat Facebook-tegi paraqshasynda.
Sondai-aq depýtat óz sózin mynandai qarapaiym mysalmen dáleldei túsedi:
Qurylys kompaniiasy 200 páterlik turǵyn úi saldy delik. Shamamen quny - 5 mlrd teńge. Onyń 4 milliardy - material, transport, jumys kúshi, basqa da shyǵyndar, iaǵni ózindik quny. Qalǵan 1 mlrd teńge - taza paida. Endi osy 1 milliardtyń ishinen 16% NDS (qosymsha qun salyǵy) tóleýge mindetti bolady. Biraq kompaniia bul salyqty óz qaltasynan emes, bul shyǵyndy páter baǵasyna qosyp, tutynýshyǵa artyp qoiady.
Nátijesinde páter baǵasy avtomatty túrde qymbattaidy. Tek turǵyn úi emes, qurylys materialdary, kommýnaldyq qyzmetter, logistika, jumys kúshi - bári qymbattaityny anyq. Sonyń saldarynan qurylys kompaniialaryna osy resýrstardy jetkizip otyrǵan, shaǵyn jáne orta mekemelerden, olar bas tarta bastaidy. Bul mekemelerdiń jabylýyna, jumys oryndarynyń qysqarýyna ákeledi, iaǵni búkil qurylys naryǵyna keri áser etedi.
Osylai degen Samat Musabaev vitse-premer sóziniń taǵy bir jalǵan tusyn áshkereleidi.
"Taǵy da Skliar myrza, "Baqytty otbasy" baǵdarlamasy arqyly biz baǵany jobalyq-smetalyq qujattamaǵa sai rettep otyrmyz" degen sózi de suraq týdyrady. Sebebi Zań qabyldandy. Endi ony qalai jáne kim retteitini túsiniksiz? Bul jerde Memlekettiń ózi qabyldaǵan zańǵa keiin "rettep otyramyz " deýi — quqyqtyq memleket ustanymyna qaishy. Salyqty kim tóleitini emes, onyń salmaǵyn kim kóteretini mańyzdy. Qazirgi jaǵdaida bul salmaqty kóteretin - tek qarapaiym halyq. Sol sebepti, bul másele boiynsha shynaiy aqparat pen ashyq dialog aýadai qajet dep sanaimyn. Óitkeni shyndyq aitylmasa, halyqtyń bilikke degen senimi de álsirei túsedi", dep sózin qorytyndylaidy ol.
Aita ketsek, 2025 jyly 31 shildede arnaiy brifing barysynda Premer-ministrdiń birinshi orynbasary Roman Skliar 2026 jyldan bastap jańa Salyq kodeksi kúshine engen kezde baspana baǵasy qalai ózgeretini týraly suraqqa jaýap berip, óz oiymen bólisken bolatyn.
