«Adam kapitalynyń sapasyn barynsha arttyrý kerek. Bul másele meniń airyqsha nazarymda ekenin bilesizder. Sebebi, Qazaqstannyń basty bailyǵy – adam. Qarym-qabileti zor, bilimdi azamattar elimizdi alǵa bastaidy. Sol úshin bilim berý júiesin jan-jaqty damytý qajet. Sońǵy jyldary memleket bul salaǵa investitsiiany edáýir kóbeitti. Balabaqsha tapshylyǵy birtindep azaiyp keledi. Barlyq oblysta mektep salý, ony jóndeý jumystary qarqyndy júrgizilip jatyr», – dedi Qasym-Jomart Toqaev.
Sonymen qatar Prezident oqý oryndaryn materialdyq-tehnikalyq jabdyqtaý isi jandanǵanyn aitty.
«Biraq, munyń ózi jetkiliksiz. Bilim sapasyn, ásirese, orta bilimniń deńgeiin arttyrý úshin batyl sheshim qabyldaý qajet. Bilim berý salasynda ustaz – eń basty tulǵa. Onyń qoǵamdaǵy abyroi-bedelin arttyra berýimiz kerek.
Alaida, muǵalimderdiń, direktorlardyń jáne pedagogikalyq oqý oryndary túlekteriniń kópshiligi Ulttyq biliktilik emtihanynan óte almady.
Maǵan keibir tájiribeli ustazdar tiisti ministrlik daiyndaǵan tapsyrmalar tym kúrdeli dep shaǵymdandy. Bálkim, ony jeńildetý, jetildirý kerek shyǵar. Bul salada qatyp qalǵan qatań ereje bolmaýy kerek. Biraq, negizi, ustazdarǵa qoiylatyn talap joǵary bolýǵa tiis», - dedi Memleket basshysy.
Qasym-Jomart Toqaevtyń paiymynsha, muǵalim tapshylyǵyn jeleý etip, mektepke kez kelgen adamdy jumysqa ala berýge bolmaidy.
«Mundai áreket ustazdardyń biliktilik deńgeiin kúrt tómendetedi. Sol sebepti, muǵalim daiarlaý isin jetildirý úshin naqty sharalar qabyldaý qajet. Bul – óskeleń urpaqtyń bolashaǵyna bailanysty óte mańyzdy mindet. Bilim berý júiesindegi menedjmentti jaqsartýǵa basa mán berilýge tiis. Osy salaǵa naǵyz kásibi mamandardy tartý qajet. Bizde Prezidenttik jastar kadr rezervi bar. Dál sol siiaqty bilim salasyna ózgeris ákeletin 1 myń maman arnaiy daiyndyqtan ótetin bolady.Osyǵan orai, tiisti baǵdarlama qabyldanady. Kadr máselesi joǵary bilim berý júiesi úshin de óte ózekti», - dedi Memleket basshysy.
