Bul týraly "Qasqa jol" baǵdarlamasynda aityldy dep habarlaidy Stan.kz.
Arman Shoraev rýǵa bólinbeidi. "Ár qazaq meniń - jalǵyzym" dep júrgen azamat. "Qazaq rýǵa bólinbeidi, qazaq rýdan quralady" deidi ol. Ózin biliktiń emes, táýelsiz azamatpyn dep tanystyrdy. Odan bólek vaktsina máselesine toqtaldy.
"Men Reseidiń vaktsinasyn salǵyzbaimyn. Vaktsinaǵa qarsy emespin. Biraq men evrei ǵalymaryna kóp senemin. Pfizer vaktsinasyn salǵyzǵym keledi. Eger ony ala almasam, otandyq vaktsinany qoldaimyn. Óz ǵalymdarymyzǵa senemin", - dedi Shoraev.
Qoǵam qairatkeri ultshyl emes. Elimizde qazaqqa jany jaqyn ózge azamattar da, qazaq úshin kúrese almaityn óz azamattarymyz de jeterlik dep sanaidy.
"Men tanityn nebir ózge ult ókilderi bar. Jany qazaq dep tur. Ár salada júr. Al kóp sóileitin, isinen sózi kóp, qazaqqa jany ashyǵan adamdai kórinetin óz azamattarymyz da jeterlik. Bizdiń alash azamattarynyń da kóbiniń áielderi ózge ultttan. Sondyqtan men ultshyl emespin", - dedi ol.
Arman Shoraev Jirinovskiidiń saiasi qýyrshaq dep sanaidy. Al óz deńgeiinde aqyldy azamat dep qosty.
"Jirinovskiimen kezdesip, sóileskenmin kezinde. Ol intellektisi joǵary damyǵan azamat. Aqyldy azamat. Alaida qazirgi sóilep júrgeni saiqymazaqtyń, saiasi qýyrshaqtyń róli. Ol jai ǵana ról oinap júr. Biz onyń aýzyn japqyza almaimyz. Ondailar qashanda bolǵan", - dedi Shoraev.
"Bizdiń elde de jaǵympazdyq kóp. Bireýdiń bir jerin jalap joǵary mansapqa jetip júrgender bar. Jas depýtat Mádi Ahmetovtiń bilikke qalai kelgenin bárimiz bilemiz ǵoi. Ol jastarǵa teris úlgi. Ondailar kóp qoi. Jaǵympazdardy depýtat qylý - bilik qastandyǵy", - dedi qoǵam qairatkeri.
Jýrnalist aýyl sharýashylyq jerin satýǵa qarsy. Al úi-jai salý úshin qazaqqa jer satylýy kerek dep sanaidy. Aýylsharýashylyq jerler tek qana jalǵa berilýi kerek degen pikirde.
"Aýylsharýashylyq jerler satylmaýy kerek. Ol tek jalǵa berilip, igerilý kerek. Sebebi ol ortaq jer. Al úi-jai salýǵa jerdi azamattarǵa satýǵa bolady", - dedi ol.
Arman Shoraev elimizde ótken LGBT ókilderine qarsy. Olarǵa qoldaý joǵary jaqtan da bolýy múmkin dep sanaidy.
"Bizde Aqordada da buryn LGBT ókilderi bolǵan, parlamentte de, úkimette de bar. Esimderine deiin bilemin. Olar az bolsa da, qoldaý jasaidy dep oilaimyn. Olarǵa qarsy bolý kerek. Sherýge ruqsat etpeý kerek. Birinshiden biz musylmanbyz, ekinshiden qazaqpyz. Ondai arsyzdyqqa jol bermeý kerek", - dedi.
Shoraev myrza qol bosta ańshylyqqa shyǵyp, saiatshylyq qurady. Tipti shetelge shyǵyp, qaz atady. Óz basy Qazaqstanda qasqyr aýlaýǵa qarsy. Sebebi, qasqyrdy qazaqtyń móri, túz taǵysy, kieli janýary sanaidy.
"Men buryndary jan-janýarǵa ańshylyqqa shyǵatyn edim. Qazir tek qaz atýǵa baramyn. Sebebi qazdyń sany kóp. Olardyń ańshylyqpen joiylyp ketý qaýpi joq. Sondyqtan qazǵa shyǵamyn. Ańdy atqanda úrkitip atady. Tepe-teńdik bolý kerek. Ańnyń qashýyna múmkindik bolý kerek. Bizde ondaidy bile bermeidi", - dedi jýrnalist.
Eske salsaq, osyǵan deiin zańsyz qasqyr aýlamaq bolǵan Toqtar Áýbákirovtiń basy daýǵa qalǵan edi. Arman Shoraev Toqtar Áýbákirovke barlyǵy jarasady dep aqtady.
"Toqtar aǵaǵa bári jarasady. Ol qazaqtyń erkesi. Ol kisine qylmys jasadyń dep aiyptaýǵa bolmaidy. Ol kisi ál-Farabi kóshesimen qarsy baǵytta júrse de bolady. Óz basym qatty qurmetteimin. Aldaǵy ýaqytta birge qaz atýǵa shaqyrsam ba deimin", - dedi ol.
Arman Shoraev qazirgi ótpeli ýaqytta bilikte Qasym-Jomart Toqaevtyń basshylyq etkenin qoldaidy. Al elbasyǵa uzaq ǵumyr tiledi.
"Qazir ótpeli kezeń. Bundai ýaqytta bilikte er azamat bolǵany jón. Al 25-50 jylda áiel adam basqarsa bolady dep oilaimyn. Sebebi, áiel adamnyń bilikte bolǵany da jaqsy. Olarda qanaǵat bolady. Er adamdarǵa qaraǵanda jemqorlyq azaiady. Bizde júie ózgeredi. Kezinde Keńes Odaǵy da qulady ǵoi. Bizde de ózgeris bolady. Elbasyǵa uzaq ǵumyr tileimin. Kezinde Qazaq kúres federatsiiasyn basqarýdy usynyp edim. Áli de sol oidamyn. Qazaq kúresine qoldaý bolar edi dep oilaimyn", - dedi Shoraev.
