Túrkistan oblysynyń ákimi Nuralhan Kósherovtiń tóraǵalyǵymen ótken apparattyń aptalyq májilisinde mádeniet jáne sport salalaryn damytý joldary,ózekti máseleleri talqylandy. Óńir basshysy atalǵan basqarma basshylary men aýdan, qala ákimderine jumysty júieleýdi jáne jandandyrýdy tapsyrdy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Mádeniet jáne sport – eldiń eńsesin kóterip, sana-sezimin ógertip, qoǵamǵa áser etetin salalar. Mádeniet mekemeleriniń jumysyn jandandyryp, qazaqtyń ónerin, mádenietin, salt-dástúrin jas óskinniń boiyna sińirý kerek. Oblys aýmaǵyndaǵy mádeniet jáne sport nysandarynyń birinshi kezekte qajettiligin anyqtaý boiynsha bekitilgen kriteriige sáikes 3 jyldyq keshendi jospardy qaita bekitýdi tapsyramyn. Oblystaǵy bilim, mádeniet, densaýlyq saqtaý jáne taǵy basqa áleýmettik nysandarǵa tiptik jobalaý-smetalyq qujattamasy qajet. Aimaqta ótetin kontserttik baǵdarlamalardy oblystyń imidjin kóteretin kreativti ideialarmen tolyqtyryp, aldaǵy Naýryz merekesin Túrkistan qalasynda jáne aýdan, qalalarda joǵary deńgeide uiymdastyrý qajet. Óńirdegi sport mekemeleriniń ǵimarattarynyń máselesin sheshý úshin naqty usynys engizip, jumysty júieleńizder, – degen Nuralhan Kósherov atalǵan sala basshylaryna syn-eskertpe aityp, naqty mindetter júktedi.
Májiliste Túrkistan oblystyq mádeniet basqarmasynyń basshysy Ázimhan Qoilybaev pen Dene shynyqtyrý jáne sport basqarmasy basshysynyń mindetin ýaqytsha atqarýshy Almasbek Naqypbekovtyń esebi tyńdaldy.
Jaqynda aýdan, qalalardaǵy mádeniet nysandary qurylysynyń 3 jyldyq jospary bekitilgen. Josparǵa sáikes 2025-2027 jyldar aralyǵynda 30 mádeniet nysanynyń qurylysy júrgiziledi dep kútilýde. Mádeniet nysandaryna monitoring júrgizilip, tiisti usynystar engizilgen. Oblystaǵy kásibi 3 teatrda biylǵy jyly 15 jańa qoiylym qoiylmaq. Oblys aýmaǵynda jyl saiyn dástúrli túrde uiymdastyrylatyn baiqaýlar men festivalderdiń ótý formattary jańasha baǵytta josparlanýda. Respýblikalyq «Túrkistan daýysy» baiqaýy, halyqaralyq «Voice of Turan» festivali, «Kúi qudireti» respýblikalyq kúishiler baiqaýy, termeshilerdiń «Túrkistan maqamdary» respýblikalyq baiqaýy, «Turkistar» balalar shyǵarmashylyq festivali jáne ózge de mańyzdy mádeni-rýhani is-sharalar ótedi.
Oblys ákiminiń tapsyrmasymen aimaqta sport nysandarynyń qajettiligine monitoring jumystary júrgizildi. Nátijesinde 108 sport keshenin salý jáne 48 ǵimaratqa jóndeý jumystaryn júrgizý qajet ekeni anyqtaldy. Búgingi tańda oblys aýmaǵynda 3540 sport nysany tirkelgen. Onyń 2577-si bilim berý mekemelerinde bolsa, ákimdik teńgeriminde 543 nysan bar. 270 nysan jeke menshikte, al 150 nysan sport mekemeleriniń menshiginde. Basqarmaǵa baǵynysty jáne qala, aýdan ákimdikterine qarasty 100 sporttyq uiym qyzmet atqarýda. Jóndeýdi qajet etetin sport nysandaryna da jyl saiyn kezeń-kezeńimen qarjy bólinýde. Naqtyraq aitqanda, biyl 14 ǵimaratqa jóndeý jumystary júrgiziledi. Sport nysandaryna qajettilikti azaitý maqsatynda 2025 jyly 51 sport nysannyń qurylysyn aiaqtaý josparlanyp otyr.
