تۇركىستان وبلىسىنىڭ اكىمى نۇرالحان كوشەروۆتىڭ توراعالىعىمەن وتكەن اپپاراتتىڭ اپتالىق ماجىلىسىندە مادەنيەت جانە سپورت سالالارىن دامىتۋ جولدارى،وزەكتى ماسەلەلەرى تالقىلاندى. ءوڭىر باسشىسى اتالعان باسقارما باسشىلارى مەن اۋدان، قالا اكىمدەرىنە جۇمىستى جۇيەلەۋدى جانە جانداندىرۋدى تاپسىردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– مادەنيەت جانە سپورت – ەلدىڭ ەڭسەسىن كوتەرىپ، سانا-سەزىمىن وگەرتىپ، قوعامعا اسەر ەتەتىن سالالار. مادەنيەت مەكەمەلەرىنىڭ جۇمىسىن جانداندىرىپ، قازاقتىڭ ونەرىن، مادەنيەتىن، ءسالت-داستۇرىن جاس وسكىننىڭ بويىنا ءسىڭىرۋ كەرەك. وبلىس اۋماعىنداعى مادەنيەت جانە سپورت نىساندارىنىڭ ءبىرىنشى كەزەكتە قاجەتتىلىگىن انىقتاۋ بويىنشا بەكىتىلگەن كريتەرييگە سايكەس 3 جىلدىق كەشەندى جوسپاردى قايتا بەكىتۋدى تاپسىرامىن. وبلىستاعى ءبىلىم، مادەنيەت، دەنساۋلىق ساقتاۋ جانە تاعى باسقا الەۋمەتتىك نىساندارعا تيپتىك جوبالاۋ-سمەتالىق قۇجاتتاماسى قاجەت. ايماقتا وتەتىن كونسەرتتىك باعدارلامالاردى وبلىستىڭ ءيميدجىن كوتەرەتىن كرەاتيۆتى يدەيالارمەن تولىقتىرىپ، الداعى ناۋرىز مەرەكەسىن تۇركىستان قالاسىندا جانە اۋدان، قالالاردا جوعارى دەڭگەيدە ۇيىمداستىرۋ قاجەت. وڭىردەگى سپورت مەكەمەلەرىنىڭ عيماراتتارىنىڭ ماسەلەسىن شەشۋ ءۇشىن ناقتى ۇسىنىس ەنگىزىپ، جۇمىستى جۇيەلەڭىزدەر، – دەگەن نۇرالحان كوشەروۆ اتالعان سالا باسشىلارىنا سىن-ەسكەرتپە ايتىپ، ناقتى مىندەتتەر جۇكتەدى.
ماجىلىستە تۇركىستان وبلىستىق مادەنيەت باسقارماسىنىڭ باسشىسى ءازىمحان قويلىبايەۆ پەن دەنە شىنىقتىرۋ جانە سپورت باسقارماسى باسشىسىنىڭ مىندەتىن ۋاقىتشا اتقارۋشى الماسبەك ناقىپبەكوۆتىڭ ەسەبى تىڭدالدى.
جاقىندا اۋدان، قالالارداعى مادەنيەت نىساندارى قۇرىلىسىنىڭ 3 جىلدىق جوسپارى بەكىتىلگەن. جوسپارعا سايكەس 2025-2027 جىلدار ارالىعىندا 30 مادەنيەت نىسانىنىڭ قۇرىلىسى جۇرگىزىلەدى دەپ كۇتىلۋدە. مادەنيەت نىساندارىنا مونيتورينگ جۇرگىزىلىپ، ءتيىستى ۇسىنىستار ەنگىزىلگەن. وبلىستاعى كاسىبي 3 تەاتردا بيىلعى جىلى 15 جاڭا قويىلىم قويىلماق. وبلىس اۋماعىندا جىل سايىن ءداستۇرلى تۇردە ۇيىمداستىرىلاتىن بايقاۋلار مەن فەستيۆالدەردىڭ ءوتۋ فورماتتارى جاڭاشا باعىتتا جوسپارلانۋدا. رەسپۋبليكالىق «تۇركىستان داۋىسى» بايقاۋى، حالىقارالىق «Voice of Turan» فەستيۆالى، «كۇي قۇدىرەتى» رەسپۋبليكالىق كۇيشىلەر بايقاۋى، تەرمەشىلەردىڭ «تۇركىستان ماقامدارى» رەسپۋبليكالىق بايقاۋى، «Turkistar» بالالار شىعارماشىلىق فەستيۆالى جانە وزگە دە ماڭىزدى مادەني-رۋحاني ءىس-شارالار وتەدى.
وبلىس اكىمىنىڭ تاپسىرماسىمەن ايماقتا سپورت نىساندارىنىڭ قاجەتتىلىگىنە مونيتورينگ جۇمىستارى جۇرگىزىلدى. ناتيجەسىندە 108 سپورت كەشەنىن سالۋ جانە 48 عيماراتقا جوندەۋ جۇمىستارىن جۇرگىزۋ قاجەت ەكەنى انىقتالدى. بۇگىنگى تاڭدا وبلىس اۋماعىندا 3540 سپورت نىسانى تىركەلگەن. ونىڭ 2577ء-سى ءبىلىم بەرۋ مەكەمەلەرىندە بولسا، اكىمدىك تەڭگەرىمىندە 543 نىسان بار. 270 نىسان جەكە مەنشىكتە، ال 150 نىسان سپورت مەكەمەلەرىنىڭ مەنشىگىندە. باسقارماعا باعىنىستى جانە قالا، اۋدان اكىمدىكتەرىنە قاراستى 100 سپورتتىق ۇيىم قىزمەت اتقارۋدا. جوندەۋدى قاجەت ەتەتىن سپورت نىساندارىنا دا جىل سايىن كەزەڭ-كەزەڭىمەن قارجى بولىنۋدە. ناقتىراق ايتقاندا، بيىل 14 عيماراتقا جوندەۋ جۇمىستارى جۇرگىزىلەدى. سپورت نىساندارىنا قاجەتتىلىكتى ازايتۋ ماقساتىندا 2025 جىلى 51 سپورت نىساننىڭ قۇرىلىسىن اياقتاۋ جوسپارلانىپ وتىر.
