Parijdegi Lývr murajaiyndaǵy tonaýdyń zalaly 88 million eýroǵa baǵalandy. Bul týraly qala prokýrory Lor Bekko RTL radiosynyń efirinde málimdedi, dep habarlaidy Dalanews.kz.
"Lývr direktory zalaldy 88 million eýro dep baǵalady", - dedi ol.
RIA Novosti málimetinshe, Bekkonyń aitýynsha, bul soma murajaiǵa keltirilgen tarihi shyǵynmen salystyrýǵa kelmeidi. Prokýror qylmyskerler áshekeilerdi balqytýǵa nemese bólshektep satýǵa tyryssa da, olardy aqshaǵa ainaldyra almaitynyn atap ótti. Sondyqtan ol qylmyskerlerdiń oilanatynyna jáne qundy buiymdardy búldirmeitinine úmit bildirdi.
Oqiǵa ótken jeksenbide boldy. Prokýratýra málimetinshe, tonaý nebári birneshe minýt ishinde júzege asqan. Qylmysty tórt adam jasaǵan, olardyń ekeýi tikelei murajaiǵa kirgen.
Barlyǵy frantsýz patshaiymdary men imperatritsalaryna tiesili toǵyz zergerlik buiym urlanǵan. Olardyń bireýi tabylyp, murajaiǵa qaitaryldy. BAQ dereginshe, kollektsiiadaǵy eń iri asyl tas 140 karattan asatyn «Regent» brillianty ornynda qalǵan.
Ishki ister ministri Loran Nýnes qylmyskerlerdiń murajaiǵa tereze arqyly kirgenin aitty. Olar avtomunaraǵa qoiylǵan baspaldaqtyń kómegimen terezeniń áinegin «bolgarkamen» kesip túsken. Ministrdiń aitýynsha, qylmyskerler shetel azamattary bolýy múmkin.
Olar oqiǵa ornynan skýtermen qashyp ketken. Abyroi bolǵanda, eshkim zardap shekken joq.
Parijdiń burynǵy politsiia prefektisiniń pikirinshe, urylar qylmys ornyn aldyn ala muqiiat zerttegen. Qazir prokýratýra tergeý júrgizip jatyr.
