پاريجدەگى لۋۆر مۇراجايىنداعى توناۋدىڭ زالالى 88 ميلليون ەۋروعا باعالاندى. بۇل تۋرالى قالا پروكۋرورى لور بەككو RTL راديوسىنىڭ ەفيرىندە مالىمدەدى، دەپ حابارلايدى Dalanews.kz.

"لۋۆر ديرەكتورى زالالدى 88 ميلليون ەۋرو دەپ باعالادى"، - دەدى ول.

ريا نوۆوستي مالىمەتىنشە، بەككونىڭ ايتۋىنشا، بۇل سوما مۇراجايعا كەلتىرىلگەن تاريحي شىعىنمەن سالىستىرۋعا كەلمەيدى. پروكۋرور قىلمىسكەرلەر اشەكەيلەردى بالقىتۋعا نەمەسە بولشەكتەپ ساتۋعا تىرىسسا دا، ولاردى اقشاعا اينالدىرا المايتىنىن اتاپ ءوتتى. سوندىقتان ول قىلمىسكەرلەردىڭ ويلاناتىنىنا جانە قۇندى بۇيىمداردى بۇلدىرمەيتىنىنە ءۇمىت ءبىلدىردى.

وقيعا وتكەن جەكسەنبىدە بولدى. پروكۋراتۋرا مالىمەتىنشە، توناۋ نەبارى بىرنەشە مينۋت ىشىندە جۇزەگە اسقان. قىلمىستى ءتورت ادام جاساعان، ولاردىڭ ەكەۋى تىكەلەي مۇراجايعا كىرگەن.

بارلىعى فرانسۋز پاتشايىمدارى مەن يمپەراتريسالارىنا تيەسىلى توعىز زەرگەرلىك بۇيىم ۇرلانعان. ولاردىڭ بىرەۋى تابىلىپ، مۇراجايعا قايتارىلدى. ب ا ق دەرەگىنشە، كوللەكسياداعى ەڭ ءىرى اسىل تاس 140 كاراتتان اساتىن «رەگەنت» بريلليانتى ورنىندا قالعان.

ىشكى ىستەر ءمينيسترى لوران نۋنەس قىلمىسكەرلەردىڭ مۇراجايعا تەرەزە ارقىلى كىرگەنىن ايتتى. ولار اۆتومۇناراعا قويىلعان باسپالداقتىڭ كومەگىمەن تەرەزەنىڭ اينەگىن «بولگاركامەن» كەسىپ تۇسكەن. ءمينيستردىڭ ايتۋىنشا، قىلمىسكەرلەر شەتەل ازاماتتارى بولۋى مۇمكىن.

ولار وقيعا ورنىنان سكۋتەرمەن قاشىپ كەتكەن. ابىروي بولعاندا، ەشكىم زارداپ شەككەن جوق.

ءپاريجدىڭ بۇرىنعى پوليسيا پرەفەكتىسىنىڭ پىكىرىنشە، ۇرىلار قىلمىس ورنىن الدىن الا مۇقيات زەرتتەگەن. ءقازىر پروكۋراتۋرا تەرگەۋ جۇرگىزىپ جاتىر.