Rosatom basshylyǵy Reseidiń Syrtqy ister ministri Sergei Lavrovtyń Qazaqstan Prezidenti Qasym-Jomart Toqaevtyń pikirimen kelispegenine saqtyqpen qarap otyr. Sebebi dál qazir tuńǵysh AES-tiń iadrolyq tehnologiiasy tańdalyp jatqanda, Reseidegi resmi tulǵalardyń Qazaqstanǵa qatysty kez kelgen ańdamai sóilegen sózi tarazy basyn Qytai jaqqa buryp jiberýi múmkin, dep habarlaidy Dalanews.kz DALA INSIDE telegram arnasyna silteme jasap.
“Árine, Rosatom Lavrovqa eshteńe dei almaidy. Biraq korporatsiianyń ishki jabyq jiylystarynda bul másele de talqylandy”, - deidi derekkóz.
Qazaqstan Prezidenti Qasym-Jomart Toqaev halyqaralyq forýmdarda birneshe ret “aýmaqtyq tutastyq printsipiniń saqtalmaýy jańa memleketterdiń paida bolýyna, olardyń ózara qaqtyǵystarǵa urynýyna ákeledi” degen tezisin qaitalap aityp júrdi. Jaqynda Reseidiń Syrtqy ister ministri Sergei Lavrov “Kommersant” gazetine bergen suhbatynda bul pikirmen kelispeitinin málimdedi. Lavrovtyń sózinshe, Toqaev úshin “tek aýmaqtyq tutastyq quqyǵy ǵana bar”. Biraq BUU Jarǵysynda kórsetilgen ózge qaǵidattar da eskerýsiz qalmaýy tiis. Onyń bastysy, halyqtardyń ózin-ózi anyqtaý quqyǵy.
“Eki saiasatker de diplomat bolǵandyqtan, muny Aqorda men Kreml diplomatiia mamandarynyń kásibi jaryssózi retinde qaldyryp, ary qarai mazdatpaityn siiaqty. Biraq AES vendoryn tańdaý kezinde tek tehnikalyq qaýipsizdik, qurylys baǵasy men kredit paiyzy ǵana emes, saiasi táýekelder de eskeriledi”, — deidi derekkóz.
Dál osy kezde memlekettiń aýmaqtyq tutastyǵyn buzýǵa halyqaralyq quqyq normasynan dálel izdep júrgen Resei men tutastyq máselesine eshqashan shek keltirmeitin Qytai arasyndaǵy balans sońǵysyna qarai aýa bastaýy múmkin. Ne bolsa da, Rosatomdaǵylar Lavrov óz málimdemesin beker jasady degen oiǵa kelip otyrǵany anyq.
