Kino – shynaiy ómirimizdiń kórinisi emes pe? XVII Halyqaralyq «Eýraziia» kinofestivaliniń úshinshi kúniniń qatysýshylarymen ótken baspasóz konferentsiiasy osyny dáleldedi. Eń áserli filmder bizdiń jadymyzda saqtalyp, adaldyq pen úmit týraly syr shertetinin kórsetti, – dep habarlaidy Dalanews.kz.
«Jer ana» filminiń qoiýshy-operatory Ismael Blanko Ispaniianyń bos qalyp, qurdymǵa ketken aýyldary týraly sóz qozǵady. Ómir boiy aýylynyń shańyn jutyp, dala tósinde emin-erkin júrgen turǵyndardyń kúnkórisi qiyndap ketken. Bul jerlerde ómir úshin kúresýge týra keledi. Filmde shól dala men megapolistiń tynys-tirshiligi, artta qalǵan kúnder men jailylyqqa toly bolashaq sýrettelip, qarama-qaishylyqtar beinelengen.
– Bul aýyldardyń turǵyndary kásibi akterler emes. Olardyń bet-álpeti men sóileý máneri tarihtan syr shertedi. Ony oidan shyǵarý múmkin emes», – deidi ol.
Qyrǵyz rejisseri Dastan Japar Ryskeldi shynaiy oqiǵa negizinde túsirilgen «Shekaradaǵy mámile» filmin usyndy. Onyń týyndysy Ortalyq Aziia jáne túrki elderi baiqaýyna qatysýda.
– Meniń aǵam quldyqta boldy. Bul 2000 jyldary bolǵan jaǵdai, biraq osyǵan uqsas oqiǵalar áli de qaitalanyp keledi. Biz ózderin qorǵai almaityn adamdar úshin osy týraly ún qatýymyz kerek, – deidi rejisser. Osy film arqyly Dastan Japar Ryskeldi búkil Ortalyq Aziia elderinde ózektiligin joǵaltpaǵan quldyq máselesine qatysty janaiqaiyn jetkizbek.
Tatar rejisseri Salavat Iýzeevtiń «Ǵashyqtar taýy» filmi adam janynyń asyl qasieti mahabbat pen ásemdigin joǵaltpaityn tabiǵattyń kieli ekenin beineleidi. Film keiipkeri mahabbat sertimen bailanysy bar taýdy barynsha qorǵaýǵa tyrysady.
– Bul taý tek tabiǵattyń kórkem syiy emes. Bul keiipkerdiń
adaldyǵy men rýhani kúshiniń simvoly, – dedi Salavat.
Kinofestivalde erekshe áser qaldyrǵan filmderdiń biri – Arýan Anartaidyń «Joqtaý» kartinasy. Atalmysh týyndy Ortalyq Aziia jáne túrki elderi baiqaýynda baq synasýda. Otandyq rejisserdiń filmin tamashalaý úshin kórermender kezekke turyp, zaldyń ishinde ine shanshar oryn tabylmady.
– Stsenarii jazý barysynda men áli de qaiǵydan qan jutyp otyrdym. Joqtaý igi adamdardyń dúnieden ótkenine ókinip, olardy eske túsirý úshin aitylatyn sóz ǵana emes. Bul bizdiń mádenietimiz, máńgi mekenge ketkendermen syrlasýdyń joly, – dedi rejisser.
«Joqtaý» filmi jeke qaiǵy men dala dástúriniń ulylyǵyn úilestire otyryp, kórermenderdi tereń tebirentti.
«Eýraziia» kinofestivali qatysýshylar men kórermenderdi shabyttandyryp, olardy biriktire otyryp, óz jumysyn jalǵastyrýda. Kórkem týyndylardy tamashalaý múmkindigin jiberip almańyzdar. Kórsetilimder kestesimen festivaldiń resmi saitynda tanysa alasyzdar: https://eurasiaiff.info/
Dástúrli festivaldiń negizin qalaýshy jáne uiymdastyrýshy – QR Mádeniet jáne aqparat ministrligi. Kinofestivaldi tikelei uiymdastyrý Almaty qalasy ákimdiginiń qoldaýymen Sháken Aimanov atyndaǵy «Qazaqfilm» ulttyq kinostýdiiasyna júktelgen.
Aita keteiik, is-sharaǵa KAZ Minerals ken óndirý kompaniiasy, Sarens Kazakhstan, Eurasian Resources Group (ERG), Salem Entertainment, Kinopark Theatres kinoteatrlar jelisi, Astana Motors, «Qazaqtelekom» AQ jáne A-Event KZ demeýshilik etti.
