Almatyda politsiia departamentiniń 2025 jyldyń alǵashqy bes aiyndaǵy jumysyna arnalǵan qorytyndy jiyny ótti. Jiyndy departament basshysy Arystanǵani Zapparov ózi júrgizdi. Kún tártibinde ótken kezeńdegi naqty kórsetkishter, oryn alǵan kemshilikter jáne aldaǵy ýaqyttaǵy jumys baǵyttary qaraldy. Budan bólek, Memleket basshysy Qasym-Jomart Toqaevtyń quqyq qorǵaý organdaryna bergen tapsyrmalary keńinen talqylandy.
Prezident atap ótkendei, eldegi Ádildik pen Qaýipsizdik tek sóz júzinde emes, Zań men Tártiptiń naqty ústemdigi arqyly iske asýy tiis. Bul – politsiianyń qoǵamǵa shynaiy jaqyn bolýy men senimge ie bolýy úshin mindetti negiz.
Arystanǵani Zapparov jiyn barysynda politsiia qyzmetkeriniń kásibi bedeli kúndelikti is-áreket arqyly qalyptasatynyn eske saldy. Ant bergen ár qyzmetker óziniń áreketimen "Zań men Tártip" qaǵidatyna adaldyǵyn dáleldep otyrýy kerek ekenin basa aitty.
Onyń sózinshe, sońǵy bes ai ishinde Almatyda qylmystyq quqyqbuzýshylyqtar 7 paiyzǵa tómendegen. Ásirese kóshede jasalatyn jáne aýyr sanattaǵy qylmystar azaiǵan. Bul derekter qylmystyń ashylýy boiynsha júieli jumys bar ekenin kórsetedi.
Alaida Almaty – dinamikasy joǵary megapolis. Munda bir másele sheshilse, ekinshisi alǵa shyǵady. Jiynda kiberqylmys pen internet-alaiaqtyqtyń ósýi erekshe atap ótildi. Bul sanattaǵy quqyqbuzýshylyqtar búginde tirkelgen qylmystardyń jartysynan astamyn qurap otyr.
Sondyqtan da qarjy uiymdarymen bailanys ornatyp, halyq arasynda túsindirý jumystaryn jandandyrý qajettigi aityldy. Esirtkimen bailanysty qylmystardy ashý kórsetkishi birqalypty saqtalǵanymen, kontrabanda arnalary men jasyryn zerthanalardy anyqtaý baǵytynda jumysty kúsheitý – kelesi kezeńniń mindeti bolyp belgilendi.
Turmystyq zorlyq-zombylyq taqyryby da nazardan tys qalǵan joq. Bul baǵytta profilaktikalyq jumysty kúsheitip, bólimsheler arasynda ózara úilesimdilikti arttyrý jóninde naqty tapsyrmalar berildi. Sonymen qatar kóshe qozǵalysy, jol qaýipsizdigine qatysty sharalar jalǵasa bermek. Moped pen elektrsamokat júrgizýshilerin qadaǵalaý, jańartylǵan erejelerdi engizý men túsindirý jumystaryn júieleý – joldaǵy tártipti saqtaýdyń bir tetigi retinde qarastyrylyp otyr.
Kóshi-qon salasy da ózekti. Jyl basynan beri Almatyda zańsyz júrgen shetel azamattarynyń birneshe júzdegen deregi tirkelgen. Bul baǵytta da baqylaý sharalary jalǵasady. Qala qaýipsizdigi tek qylmyspen kúres emes, kóshi-qon protsesterin basqarý arqyly da qamtamasyz etilýi tiis.
Jiyn sońynda qyzmettik tártip pen ishki zańdylyqty nyǵaitý, sybailas jemqorlyqqa qarsy baqylaýdy kúsheitý jáne «Zań men Tártip» qaǵidatyn politsiianyń kúndelikti jumysynda naqty iske ainaldyrý boiynsha tapsyrmalar berildi. Almaty politsiiasynyń aldynda tek tártip saqtaý emes, turǵyndardyń senimin arttyrý degen de úlken mindet tur. Bul senim bir ǵana baspasóz máslihatymen emes, kún saiynǵy naqty jumyspen keletin dúnie.
