الماتىدا پوليسيا دەپارتامەنتىنىڭ 2025 جىلدىڭ العاشقى بەس ايىنداعى جۇمىسىنا ارنالعان قورىتىندى جيىنى ءوتتى. جيىندى دەپارتامەنت باسشىسى ارىستانعاني زاپپاروۆ ءوزى جۇرگىزدى. كۇن تارتىبىندە وتكەن كەزەڭدەگى ناقتى كورسەتكىشتەر، ورىن العان كەمشىلىكتەر جانە الداعى ۋاقىتتاعى جۇمىس باعىتتارى قارالدى. بۇدان بولەك، مەملەكەت باسشىسى قاسىم-جومارت توقايەۆتىڭ قۇقىق قورعاۋ ورگاندارىنا بەرگەن تاپسىرمالارى كەڭىنەن تالقىلاندى.

پرەزيدەنت اتاپ وتكەندەي، ەلدەگى ادىلدىك پەن قاۋىپسىزدىك تەك ءسوز جۇزىندە ەمەس، زاڭ مەن ءتارتىپتىڭ ناقتى ۇستەمدىگى ارقىلى ىسكە اسۋى ءتيىس. بۇل – پوليسيانىڭ قوعامعا شىنايى جاقىن بولۋى مەن سەنىمگە يە بولۋى ءۇشىن مىندەتتى نەگىز.

ارىستانعاني زاپپاروۆ جيىن بارىسىندا پوليسيا قىزمەتكەرىنىڭ كاسىبي بەدەلى كۇندەلىكتى ىس-ارەكەت ارقىلى قالىپتاساتىنىن ەسكە سالدى. انت بەرگەن ءار قىزمەتكەر ءوزىنىڭ ارەكەتىمەن "زاڭ مەن ءتارتىپ" قاعيداتىنا ادالدىعىن دالەلدەپ وتىرۋى كەرەك ەكەنىن باسا ايتتى.

ونىڭ سوزىنشە، سوڭعى بەس اي ىشىندە الماتىدا قىلمىستىق قۇقىقبۇزۋشىلىقتار 7 پايىزعا تومەندەگەن. اسىرەسە كوشەدە جاسالاتىن جانە اۋىر ساناتتاعى قىلمىستار ازايعان. بۇل دەرەكتەر قىلمىستىڭ اشىلۋى بويىنشا جۇيەلى جۇمىس بار ەكەنىن كورسەتەدى.

الايدا الماتى – ديناميكاسى جوعارى مەگاپوليس. مۇندا ءبىر ماسەلە شەشىلسە، ەكىنشىسى العا شىعادى. جيىندا كيبەرقىلمىس پەن ينتەرنەت-الاياقتىقتىڭ ءوسۋى ەرەكشە اتاپ ءوتىلدى. بۇل ساناتتاعى قۇقىقبۇزۋشىلىقتار بۇگىندە تىركەلگەن قىلمىستاردىڭ جارتىسىنان استامىن قۇراپ وتىر.

سوندىقتان دا قارجى ۇيىمدارىمەن بايلانىس ورناتىپ، حالىق اراسىندا ءتۇسىندىرۋ جۇمىستارىن جانداندىرۋ قاجەتتىگى ايتىلدى. ەسىرتكىمەن بايلانىستى قىلمىستاردى اشۋ كورسەتكىشى ءبىرقالىپتى ساقتالعانىمەن، كونتراباندا ارنالارى مەن جاسىرىن زەرتحانالاردى انىقتاۋ باعىتىندا جۇمىستى كۇشەيتۋ – كەلەسى كەزەڭنىڭ مىندەتى بولىپ بەلگىلەندى.

تۇرمىستىق زورلىق-زومبىلىق تاقىرىبى دا نازاردان تىس قالعان جوق. بۇل باعىتتا پروفيلاكتيكالىق جۇمىستى كۇشەيتىپ، بولىمشەلەر اراسىندا ءوزارا ۇيلەسىمدىلىكتى ارتتىرۋ جونىندە ناقتى تاپسىرمالار بەرىلدى. سونىمەن قاتار كوشە قوزعالىسى، جول قاۋىپسىزدىگىنە قاتىستى شارالار جالعاسا بەرمەك. موپەد پەن ەلەكترساموكات جۇرگىزۋشىلەرىن قاداعالاۋ، جاڭارتىلعان ەرەجەلەردى ەنگىزۋ مەن ءتۇسىندىرۋ جۇمىستارىن جۇيەلەۋ – جولداعى ءتارتىپتى ساقتاۋدىڭ ءبىر تەتىگى رەتىندە قاراستىرىلىپ وتىر.

كوشى-قون سالاسى دا وزەكتى. جىل باسىنان بەرى الماتىدا زاڭسىز جۇرگەن شەتەل ازاماتتارىنىڭ بىرنەشە جۇزدەگەن دەرەگى تىركەلگەن. بۇل باعىتتا دا باقىلاۋ شارالارى جالعاسادى. قالا قاۋىپسىزدىگى تەك قىلمىسپەن كۇرەس ەمەس، كوشى-قون پروسەستەرىن باسقارۋ ارقىلى دا قامتاماسىز ەتىلۋى ءتيىس.

جيىن سوڭىندا قىزمەتتىك ءتارتىپ پەن ىشكى زاڭدىلىقتى نىعايتۋ، سىبايلاس جەمقورلىققا قارسى باقىلاۋدى كۇشەيتۋ جانە «زاڭ مەن ءتارتىپ» قاعيداتىن پوليسيانىڭ كۇندەلىكتى جۇمىسىندا ناقتى ىسكە اينالدىرۋ بويىنشا تاپسىرمالار بەرىلدى. الماتى پوليسياسىنىڭ الدىندا تەك ءتارتىپ ساقتاۋ ەمەس، تۇرعىنداردىڭ سەنىمىن ارتتىرۋ دەگەن دە ۇلكەن مىندەت تۇر. بۇل سەنىم ءبىر عانا باسپا ءسوز ماسليحاتىمەن ەمەس، كۇن سايىنعى ناقتى جۇمىسپەن كەلەتىن دۇنيە.