Qazaqstannyń burynǵy prezıdenti Nursultan Nazarbaevtyń jubaıy — Sara Alpysqyzy qazirgi ýaqytta Almatydaǵy aýrýhanalardyń birinde em qabyldap jatyr, dep habarlaıdy Dalanews.kz Orda.kz-ke siltep.
Aýrýhana ǵımaratynyń syrtynda kúzet qoıylǵan. İshke erkin kirip-shyǵýǵa nemese túsirilim jasaýǵa tyıym salynǵan. Aýrýhanaǵa emdelýge kelgen keıbir azamattar Sara Alpysqyzyn ishki bólimshelerde kórgenin rastaǵan.
Osy jaǵdaıǵa baılanysty Orda.kz tilshisi QR Prezıdenti İs basqarmasyna qarasty medısınalyq ortalyqtyń baspasóz hatshysy Elena Koemeske habarlasqan. Degenmen naqty málimet ala almaǵan.
– Qazir bizde eshqandaı naqty aqparat joq. Ózimiz de resmı habardy kútip otyrmyz, – degen qysqa jaýappen shekteldi baspasóz ókili.
Redaksıanyń derekkózderi Sara Alpysqyzynyń densaýlyǵyndaǵy aqaý jasyna baılanysty bolýy múmkin ekenin aıtady. Biraq naqty dıagnozy jarıalanbaǵan.
Sara Nazarbaevamen jaqyn aralasqan azamattardyń biri – Qazaqstandaǵy balalar úıleri túlekteri qaýymdastyǵynyń prezıdenti Rafael Gasanov. Ol qazirgi kezde Sara Nazarbaevanyń janynda jaqyn adamdary men týystary bar ekenin rastady.
– Biz onyń qasyndaǵy adamdarmen baılanysyp, sálem joldadyq. Sara Alpysqyzy bizge jaqyn jan. Ol bizdi jaqsy tanıdy. Biz de onyń tezirek saýyǵyp ketýin tilep otyrmyz, – dedi Rafael Gasanov.
Gasanovtyń aıtýynsha, ol — Sara Nazarbaeva negizin qalaǵan SOS balalar aýyldarynyń túlegi. Ol Sara Alpysqyzynyń óz tárbıelenýshilerine jasaǵan qamqorlyǵyn erekshe jylylyqpen eske alady.
– Sara apaı jıi kelip turatyn. Syılyq ákeletin, ómir týraly, adamı qundylyqtar jaıynda aıtatyn. Biz ony «anamyz» deıtinbiz. Ol sheneýnikterdiń ózi syılaıtyn tulǵa bolatyn. Qazaqstanda bala quqyqtaryn qorǵaý júıesiniń negizin qalaǵandardyń biri de — osy kisi. Sondyqtan onyń esimi árqashan qurmetke laıyq, – dedi ol.
Onyń aıtýynsha, Sara Alpysqyzy burynǵy tárbıelenýshilerimen áli kúnge deıin baılanys úzbegen. Jaqynda ǵana Rafael Gasanovqa kitaptar syılap, qoǵamdyq jumysynda sáttilik tilegen.
Qazirgi kezde onyń qasynda qyzdary men eń jaqyn adamdary bar. Olar jurtty sabyrǵa shaqyryp, Sara Alpysqyzynyń saýyǵyp ketýine úmit artyp otyr.
