Baiaǵynyń úlkenderi juldyzdarǵa qarap, erteńgi aýa raiyn boljap, jastardy kórip, sol eldiń bolashaǵy týraly sóz aitady eken.
«Úsh kúndigin oilamaǵan áielden, úsh jyldyǵyn oilamaǵan erkekten bez» deidi eken burynǵylar.
Qazirgi elde bolyp jatqan saiasi oqiǵalardy saralap, qazirgi jaǵdaidy baǵalap, bolashaqty bolmasa da biylǵy jaǵdaiǵa boljam jasap kóreiik.
Árine, men bolashaqty boljaityn kóripkel, bal ashatyn qumalaqshy da emespin, aýyldaǵy qarapaiym kóp qazaqtyń birimin, sondyqtan da qate bolýy ábden múmkin.
Sonymen, eldi shýlatqan referendým da bolyp ótti. Jańa Konstitýtsiia qabyldandy. Sailaýdyń qalai ótkeni elge málim… Jańa Konstitýtsiia 1 shildede kúshine enedi. Parlament pen Senat taraidy. Onyń ornyna kúzde sailaý bolyp, Quryltai depýtattary sailanady. Ol sailaýdyń da qalai ótetinin jaqsy bilesizder…
Vitse-prezident kim bolady?
Qazir qoǵamda «Vitse-prezident kim bolady?» degen suraq jii qoiylady.
Ár saiasatker óz boljamyn aityp otyr.
Bul – prezidentten keiingi ekinshi adam. Bylai aitqanda, prezident qyzmetten ketkende, jańadan sailaý ótkenshe el basshysy bolatyn, kelesi prezident bolýy múmkin adam.
Sondyqtan da prezident ózine eń senimdi adamdy qoiady.
Meniń saiasi boljamym boiynsha,vitse-prezident Máýlen Áshimbaev bolýy múmkin.
Sebebi qazir de sol orynda otyrǵan kadr.
Nazarbaev ta ornyna Senat tóraǵasyn qaldyrdy. Kórshi elderde Máýlenge qarsy bola qoimas dep sanaimyn.
Quryltai tóraǵasy kim bolady?
Parlament taratylyp, ornyna Quryltai keledi.
Quryltai depýtattary tek partiialar usynǵan adamdar bolady.
Meniń oiymsha, Quryltai tóraǵasy Erlan Karin sailanady.
Erlan Tynymbaiuly Toqaev prezident bolyp sailanǵannan beri keńesshisi, ári senimdi serigi bolyp kele jatqan dosy.
Sondyqtan da Erlandy jumyssyz qaldyrmaidy.
Úkimet basshysy kim bolady?
Quryltai sailaýy ótkennen keiin, qazirgi Oljas Bektenov basqaratyn Úkimet taraidy.
Úkimet basshysyna qazirgi Májilis tóraǵasy Erlan Qoshanovty usynady.
Árine, bul qyzmet Erlannyń qolynan keledi dep sanaimyn.
Sebebi, barlyq salada jumys jasaǵan tájiribesi mol kadr.
BUU Bas hatshysy kim bolady?
Biyl kúzde Birikken Ulttar Uiymy Bas hatshysynyń sailaýy bolady.
Bas hatshyny sailaýda negizgi bes memlekettiń yqpaly zor bolady.
Olar: AQSh, Resei, Qytai, Frantsiia, Ulybritaniia.
BUU Bas Assambleiasy bekitedi.
Jańadan sailanǵan BUU Bas hatshy 2027 jylǵy 1 qańtarda jumysqa kirisedi.
Meniń oiymsha, BUU Bas hatshysy Qasym-Jomart Toqaev bolýy múmkin.
Toqaevty bul qyzmetke AQSh prezidenti D. Tramp usynady.
Sebebi, sońǵy kezderi Tramp Toqaevty beker maqtap júrgen joq shyǵar.
Eń bastysy, Q. Toqaev – kásibi diplomat, birneshe tilde erkin sóileidi.
BUU júiesinde jumys jasaǵan tájiribesi jetkilikti.
Ári halyqaralyq deńgeide tanymal tulǵa. Toqaevtyń kandidatýrasyn Qytai men Resei qýana qoldaidy, Frantsiia men Ulybritaniia da qarsy bolmaýy kerek.
Árine, álemdegi aýmaly-tókpeli zamanda olai bolmaýy da múmkin.
Múmkin, BUU Bas hatshysy áiel adam bolýy da múmkin degen boljam bar.
Olai bolsa, Toqaev 2029 jylǵa deiin otyrady.
Sonymen, sizdiń oiyńyzsha kelesi prezident kim bolýy múmkin?
Qurmetti meniń kózi ashyq, kókiregi oiaý oqyrmandarym, sizder bul boljamǵa ne deisizder?
Avtory: Jánibek Qojyq
