Abai oblysynda jol apatynan qaza tapqan eki órt sóndirýshiniń áriptesteri Kýrchatov qalasyndaǵy №9 órt sóndirý bóliminiń (PCh-9) qyzmetin uiymdastyrý tártibin tekserýdi surady, dep habarlaidy dalanews.kz.
Abai oblysy Politsiia departamentiniń málimetinshe, 26 tamyz kúni saǵat 15:30 shamasynda Semei – Kýrchatov tasjolynyń 35-shaqyrymynda Chevrolet Nexia jáne Kia Rio avtokólikteri soqtyǵysqan.
Politsiianyń habarlaýynsha, Chevrolet Nexia júrgizýshisi aldynda kele jatqan «Gazel» kóligin basyp ozý kezinde qarsy qozǵalys jolaǵyna shyǵyp ketken. Sonyń saldarynan Kia Rio kóligimen betpe-bet soqtyǵysqan. Apat saldarynan eki kóliktiń júrgizýshileri men jolaýshylary qaza tapty.
Qaitys bolǵandardyń arasynda Kýrchatov qalasyndaǵy №9 órt sóndirý bóliminde qyzmet atqarǵan Abai oblysy Tótenshe jaǵdailar departamentiniń qyzmetkerleri Arnur Ádkenov pen Ermek Sydyqov ta bolǵan.
Áriptesteri ne deidi?
Telegram-daǵy HALYQSTAN arnasynyń málimetinshe, qaiǵyly oqiǵadan keiin PCh-9 qyzmetkerleri áleýmettik jeli arqyly qyzmetti uiymdastyrý jaǵdailaryn tekserýdi surap úndeý jasaǵan. Bul úndeýdi «OSA» qoǵamdyq birlestigi jariialaǵan.
Úndeýde bólim qyzmetkerleriniń edáýir bóligi Semei qalasynda turatyny, al qyzmet ornyna jetý úshin shamamen 130-140 shaqyrym jol júrýge májbúr ekeni aitylǵan. Olardyń sózinshe, tamyz aiy boiy jeke quram birneshe ret dabyl boiynsha kóterilip, qysqa merzim ishinde bólimshege jetý talaby qoiylǵan.
Sondai-aq áriptesteriniń aitýynsha, 26 tamyz kúni de jeke quram dabylmen kóterilgen. Arnur Ádkenov pen Ermek Sydyqov sol kezde qyzmet ornyna bara jatqan.
PCh-9 bólimindegi jaǵdaiǵa qatysty málimdeme
Úndeýde PCh-9 bóliminde bir jyldan astam ýaqyt boiy bólim basshysy men onyń orynbasary joq ekeni, sonyń saldarynan qoldanystaǵy qyzmetkerlerge túsetin júkteme artqany aitylǵan. «OSA» qoǵamdyq birlestigi qyzmetti uiymdastyrý tártibi, dabyl berý jáne tekserý júiesi, sondai-aq qyzmetkerlerdiń bólimshege jetý merzimine qoiylatyn talaptar jan-jaqty ári obektivti tekserilýi qajet dep esepteidi.
Birlestik ókilderiniń pikirinshe, tekseris barysynda qyzmetkerler kótergen máselelerdiń qanshalyqty negizdi ekeni anyqtalyp, yqtimal zańbuzýshylyqtarǵa baǵa berilýi tiis.
TJD qyzmettik tergeý bastady
Abai oblysy Tótenshe jaǵdailar departamenti atalǵan oqiǵa boiynsha qyzmettik tergeý bastalǵanyn habarlady. Vedomstvo qaza tapqan qyzmetkerlerdiń otbasylary men jaqyndaryna kóńil aityp, olarǵa qajetti kómek pen qoldaý kórsetilip jatqanyn málimdedi.
TJD málimetinshe, qyzmettik tergeý qorytyndysy boiynsha laýazymdy tulǵalardyń áreketterine obektivti baǵa beriledi.
