Astana qalasynyń mádeniet basqarmasynyń burynǵy basshysy Bolat Majaǵulov pen qurylys kompaniiasynyń basshysy Mádi Qanapin osy jyldyń qańtar aiynda buǵan deiin ózderine qatysty shyǵarylǵan sot úkimine qarsy apelliatsiialyq shaǵym túsirdi. Advokattar olardy aqtap, bas bostandyǵynan aiyrýmen bailanysty emes jaza taǵaiyndaýdy suraidy, dep habarlaidy Dalanews.kz.
Aita ketsek, Astana qalasynyń qylmystyq ister jónindegi aýdanaralyq sotynyń 2025 jylǵy 31 qańtardaǵy úkimimen eks-sheneýnik óziniń qyzmet babyn paidalana otyryp, adamdar tobynyń aldyn ala sóz bailasýymen, asa iri mólsherde senip tapsyrylǵan biýdjet qarajatyn talan-tarajǵa saldy degen aiyppen 8 jyl 6 ai merzimge bas bostandyǵynan aiyrylǵan. Sondai-aq oǵan kómektesip, senip tapsyrylǵan biýdjet qarajatyn asa iri mólsherde talan-tarajǵa salýǵa járdemdesý faktisi boiynsha qurylys kompaniiasynyń ókili de kináli dep tanylyp, ol 3 jyl 6 ai merzimge bas bostandyǵynan aiyryldy.
Sottalǵandarǵa memlekettik jáne kvazimemlekettik sektorda qyzmet atqarý quqyǵynan ómir boiyna aiyrý túrindegi qosymsha jaza taǵaiyndalǵan.
Sondai-aq Astana qalasynyń Mádeniet basqarmasy" MM-niń paidasyna ortaq tártipte sottalǵandardan 1 mlrd teńgeden astam múliktik zalal óndirilgen.
"Apelliatsiialyq satymen sot úkimi ózgerissiz qaldyryldy. Aiyptalýshylardyń kinási kýágerlerdiń aiǵaqtarymen, taýartaný zertteýiniń qorytyndylarymen, mamanmen, sarapshymen, aýditor, sondai-aq jasyryn tergeý áreketteriniń materialdarymen rastaldy", delingen Astana sottary baspasóz qyzmetiniń habarlamasynda.
Sot aktisi zańdy kúshine endi.
Buǵan deiin Majaǵulovtyń memlekettik mekeme basshysy bola otyryp, sybailasymen 2016 jyly Esil ózeniniń jaǵalaýyndaǵy "Kún" sýburqaǵynyń qurylysyn qosa alǵanda, "Sý siqyry" jáne "Esil ózenindegi jaryq illiýminatsiiasy men otshashý shoýy" sharasyn ótkizýge bólingen biýdjet qarajatyn smetalyq baǵany arttyrý, arzandaý jáne sapasy tómen materialdardy qoldaný arqyly talan-tarajǵa salyp, memleketke 1 mlrd teńgeden astam, asa iri mólsherde zalal keltirgeni habarlanǵan.
