استانا قالاسىنىڭ مادەنيەت باسقارماسىنىڭ بۇرىنعى باسشىسى بولات ماجاعۇلوۆ پەن قۇرىلىس كومپانياسىنىڭ باسشىسى ءمادي قاناپين وسى جىلدىڭ قاڭتار ايىندا بۇعان دەيىن وزدەرىنە قاتىستى شىعارىلعان سوت ۇكىمىنە قارسى اپەللياسيالىق شاعىم ءتۇسىردى. ادۆوكاتتار ولاردى اقتاپ، باس بوستاندىعىنان ايىرۋمەن بايلانىستى ەمەس جازا تاعايىنداۋدى سۇرايدى، دەپ حابارلايدى Dalanews.kz.
ايتا كەتسەك، استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ 2025 جىلعى 31 قاڭتارداعى ۇكىمىمەن ەكس-شەنەۋنىك ءوزىنىڭ قىزمەت بابىن پايدالانا وتىرىپ، ادامدار توبىنىڭ الدىن الا ءسوز بايلاسۋىمەن، اسا ءىرى مولشەردە سەنىپ تاپسىرىلعان بيۋدجەت قاراجاتىن تالان-تاراجعا سالدى دەگەن ايىپپەن 8 جىل 6 اي مەرزىمگە باس بوستاندىعىنان ايىرىلعان. سونداي-اق وعان كومەكتەسىپ، سەنىپ تاپسىرىلعان بيۋدجەت قاراجاتىن اسا ءىرى مولشەردە تالان-تاراجعا سالۋعا جاردەمدەسۋ فاكتىسى بويىنشا قۇرىلىس كومپانياسىنىڭ وكىلى دە كىنالى دەپ تانىلىپ، ول 3 جىل 6 اي مەرزىمگە باس بوستاندىعىنان ايىرىلدى.
سوتتالعاندارعا مەملەكەتتىك جانە كۆازيمەملەكەتتىك سەكتوردا قىزمەت اتقارۋ قۇقىعىنان ءومىر بويىنا ايىرۋ تۇرىندەگى قوسىمشا جازا تاعايىندالعان.
سونداي-اق استانا قالاسىنىڭ مادەنيەت باسقارماسى" ءمم-نىڭ پايداسىنا ورتاق تارتىپتە سوتتالعانداردان 1 ملرد تەڭگەدەن استام مۇلىكتىك زالال وندىرىلگەن.
"اپەللياسيالىق ساتىمەن سوت ۇكىمى وزگەرىسسىز قالدىرىلدى. ايىپتالۋشىلاردىڭ كىناسى كۋاگەرلەردىڭ ايعاقتارىمەن، تاۋارتانۋ زەرتتەۋىنىڭ قورىتىندىلارىمەن، مامانمەن، ساراپشىمەن، اۋديتور، سونداي-اق جاسىرىن تەرگەۋ ارەكەتتەرىنىڭ ماتەريالدارىمەن راستالدى"، دەلىنگەن استانا سوتتارى باسپا ءسوز قىزمەتىنىڭ حابارلاماسىندا.
سوت اكتىسى زاڭدى كۇشىنە ەندى.
بۇعان دەيىن ماجاعۇلوۆتىڭ مەملەكەتتىك مەكەمە باسشىسى بولا وتىرىپ، سىبايلاسىمەن 2016 جىلى ەسىل وزەنىنىڭ جاعالاۋىنداعى "كۇن" سۋبۇرقاعىنىڭ قۇرىلىسىن قوسا العاندا، "سۋ سيقىرى" جانە "ەسىل وزەنىندەگى جارىق يلليۋميناسياسى مەن وتشاشۋ شوۋى" شاراسىن وتكىزۋگە بولىنگەن بيۋدجەت قاراجاتىن سمەتالىق باعانى ارتتىرۋ، ارزانداۋ جانە ساپاسى تومەن ماتەريالداردى قولدانۋ ارقىلى تالان-تاراجعا سالىپ، مەملەكەتكە 1 ملرد تەڭگەدەن استام، اسا ءىرى مولشەردە زالال كەلتىرگەنى حابارلانعان.
