Qarjylyq monitoring agenttigi azamattardy jeke bank kartalaryn paidalaný arqyly qylmystyq tabystardy zańdastyrý úshin ońai tabys usynyp, qylmystyq shemalarǵa tartý faktileri jiilep ketkenin aitady, dep habarlaidy Dalanews.kz.
Bótender aqshaǵa bank kartasy arqyly aqsha aýdaryp alýdy ótinedi. Bul, kóbine esirtkiden túsken aqshany zańdastyrý úshin jasalady. Osylaisha, az aqshaǵa qyzyqqan osal top ókilderi, ózi de bilmesten "drop" bolý qaýipin eskermei, qylmystyq shemalarǵa tartylýy múmkin.
Aqsha kiber quqyqbuzýshylyqtardan nemese esirtki jáne adam satý siiaqty qylmystyq shemalardan tartylýy yqtimal.
QMA júrgizgen taldaýyna sáikes, esirtki satýmen bailanysty shemalarda jalpy ainalymy 22 mlrd teńge bolatyn 30 myń bank kartasy paidalanylǵan.
Mundai zańsyz shemalarǵa qatysý tulǵalardyń múlkin tárkileý, ákimshilik jáne qylmystyq jaýapkershilik siiaqty aýyr saldarǵa ákeledi.
QMA sońǵy zertteýlerine sáikes, qarjylyq qiyndyqtarǵa tap bolǵandardyń, atap aitqanda jumyssyzdar, stýdentter jáne áleýmettik osal top ókilderiniń alaiaqtardyń jeńil jolmen ońai oljaǵa kenelý ýádelerine senip, "drop" bolyp qalý qaýipi joǵary ekeni anyqtaldy.
Astana men Qaraǵandy qalasynyń stýdentteri jáne Temirtaýlyq 64 jastaǵy zeinetker "drop" retinde Telegram-dúkeninde esirtki satýdan alynǵan aqshany jylystatý shemasyna qatysqan. Olardyń shottary arqyly 100 mln teńgeden astam qarjy ótken. Bul narkoshoptyń jalpy ainalymy 2 mlrd teńgeden asqan.
Taǵy bir jaǵdaida Almatyda 20 jastaǵy stýdenttiń kartasy paidalanylyp, onyń shotyna 900-den astam adamnan 22,5 mln teńge túsken. Aýdarymdar 7.5 myńnan 15 myń teńgege deiingi aralyqta bolǵan, bul somalar esirtki zattarynyń bir rettik dozalarynyń qunyna sáikes keledi. Keiinnen bul aqsha quqyq buzýshylardyń kripto-ámiiandaryna shyǵaryldy.
Onlain dialog arqyly beitanys azamattar nemese kompaniianyń ókilderi habarlasyp, shotyńyzǵa syiaqyǵa aqsha aýdaryp, esesinen ońai aqsha tabýdy usynǵan jaǵdaida qyraǵylyq tanytyp, ózińizdi qylmystyq shemanyń múshesi bolýdan saqtańyz.
