RF prezıdentiniń baspasóz hatshysy Dmıtrıı Peskov Kremldiń Aqtaý mańyndaǵy áýe apaty týraly esepke qatysty pikir bildirýin orynsyz dep sanaıdy, dep habarlaıdy Dalanews.kz.
Brıfıń barysynda Peskov Reseıdiń tıisti organdary Qazaqstannyń Kólik mınıstrliginiń Azerbaijan Airlines (AZAL) avıakompanıasyna tıesili Embraer-190 jolaýshylar ushaǵynyń apatyn tergeý boıynsha aldyn ala esebin muqıat zertteıtinin aıtty.
“Bul – aldyn ala esep. Árıne, bizdiń tıisti vedomstvolar ony úlken jaýapkershilikpen, muqıat zerdeleıdi. Alaıda bul taqyrypqa qatysty prezıdent ákimshiliginen túsinikteme berý orynsyz dep sanaımyz”, – dedi Peskov.
Eske salaıyq, kúni keshe Kólik mınıstrligi apatqa ushyraǵan ushaqqa qatysty aldyn ala esepti jarıalaǵan bolatyn.
Azerbaijan Airlines áýe kompanıasynyń Embraer-190 ushaǵymen bolǵan oqıǵany tergeý týraly aldyn ala esep Qazaqstan Respýblıkasy Kólik mınıstrliginiń resmı saıtynda jarıalandy.
Esep 53 betten turady.
Mınıstrlik jarıa etken aldyn ala esepte avıasıalyq oqıǵany tergeý jónindegi komısıanyń málimetteri jazylǵan. Bul aldyn ala jazylǵan aqparat, barlyq materıal zertteý nátıjeleri boıynsha naqtylanýy jáne tolyqtyrylýy múmkin. Jumys aıaqtalǵannan keıin avıasıalyq oqıǵany tergeý nátıjeleri boıynsha túpkilikti esep daıyndalady.
Aqtaýdaǵy ushaq apatynyń aldyn ala qorytyndysy boıynsha:
- Ekıpaj eki soqqy bolǵanyn sezgen (05:13:31 jáne 05:13:56), sodan keıin basqarý júıesinde aqaýlar bastaldy. Stúardessalar kapıtanǵa: «Eki oryn jarylyp ketti, men olarǵa kóterile almaımyn, óıtkeni jolaýshylar ornynan turyp ketti, men olardy qaıta otyrǵyzyp jatyrmyn» dep habarlady.
- Ushqyshtar Groznyı dıspecherlerine basqarý quraldarynyń isten shyqqanyn jáne salonǵa qustarǵa soǵylǵanyn habarlaǵan.
- Ekıpaj Mıneralnye Vodyǵa, sodan keıin Mahachkalaǵa qoný sharttaryn surady, sodan keıin olar Bakýge oralýdy sheshti. Biraq sodan keıin ekıpaj taǵy da oıyn ózgertip, aýa raıy qolaıly bolǵan Aqtaýǵa barady.
- Ekıpaj Aqtaý áýejaıynyń munarasymen baılanysqan kezde halyqaralyq apat sıgnalyn beredi.
- Saǵat 06:27-de ushaq jerge soqtyǵysty.
Aldyn ala esepte apattyń sebepteri týraly eshqandaı málimet joq.
Sondaı-aq, gıdravlıkalyq júıelerdiń zaqymdanýy týraly aıtylady, olar "áýe kemesiniń komponentterine engen syrtqy zattardan bolýy múmkin".
