Kreml Ýkrainanyń Eýroodaqqa kirýine qatysty pikir bildirdi, dep habarlaidy Dalanews.kz RBK-ǵa silteme jasap.
Ýkrainanyń Eýroodaqqa kirýi - eldiń egemendik quqyǵy, bul ekonomikalyq integratsiia máselesi, sondyqtan eshkim Kievke shart qoia almaidy.
Resei prezidentiniń baspasóz hatshysy Dmitrii Peskov osylai dep málimdedi. Onyń aitýynsha, bul - kez kelgen eldiń derbes tańdaýy, al ekonomikalyq integratsiiaǵa qatysty protsesterde eshbir memleket basqa bir elge talap qoia almaidy.
«Bul - kez kelgen eldiń egemendik quqyǵy. Áńgime integratsiialyq, ekonomikalyq protsester týraly bolyp otyr, munda eshkim eshteńe eshkimge diktat jasai almaidy. Biz buǵan múlde talpynbaimyz», - dedi Peskov TASS agenttigine bergen suhbatynda.
Alaida Máskeý áskeri alianstarǵa qatysty múlde basqa ustanymda ekenin erekshe atap ótti.
«Bul - múlde basqa másele, ony bári jaqsy biledi», - dedi ol.
Resei Ýkraina men NATO arasyndaǵy yqtimal odaqtastyqqa úzildi-kesildi qarsy. Máskeý bul bloktyń keńeiýin óziniń ulttyq qaýipsizdigine tikelei qaýip dep sanaidy. Resei prezidenti Vladimir Pýtin Ýkrainanyń NATO-ǵa qosylýy kenetten jasalatyn soqqy qaýpin birneshe ese arttyrady dep málimdegen. Sondyqtan Kievtiń áskeri blokqa kirýden bas tartýyn Pýtin beibit kelissózderdi bastaý sharttarynyń biri retinde ataǵan edi.
Esterińizge sala keteiik, Ýkraina 2022 jyldyń kúzine qarai NATO-ǵa jedeldetilgen tártipte kirý týraly ótinish bergen bolatyn. Sol ýaqyttan beri alians Ýkrainamen yntymaqtastyqty kúsheitý nieti týraly birneshe ret málimdegenimen, eldiń múshelikke daiyn emestigin jáne belgili bir sharttardyń oryndalýy qajettigin alǵa tartyp keledi.
