كرەمل ۋكراينانىڭ ەۋرووداققا كىرۋىنە قاتىستى پىكىر ءبىلدىردى، دەپ حابارلايدى Dalanews.kz ربك-عا سىلتەمە جاساپ.
ۋكراينانىڭ ەۋرووداققا كىرۋى - ەلدىڭ ەگەمەندىك قۇقىعى، بۇل ەكونوميكالىق ينتەگراسيا ماسەلەسى، سوندىقتان ەشكىم كييەۆكە شارت قويا المايدى.
رەسەي پرەزيدەنتىنىڭ باسپا ءسوز حاتشىسى دميتريي پەسكوۆ وسىلاي دەپ مالىمدەدى. ونىڭ ايتۋىنشا، بۇل - كەز كەلگەن ەلدىڭ دەربەس تاڭداۋى، ال ەكونوميكالىق ينتەگراسياعا قاتىستى پروسەستەردە ەشبىر مەملەكەت باسقا ءبىر ەلگە تالاپ قويا المايدى.
«بۇل - كەز كەلگەن ەلدىڭ ەگەمەندىك قۇقىعى. اڭگىمە ينتەگراسيالىق، ەكونوميكالىق پروسەستەر تۋرالى بولىپ وتىر، مۇندا ەشكىم ەشتەڭە ەشكىمگە ديكتات جاساي المايدى. ءبىز بۇعان مۇلدە تالپىنبايمىز»، - دەدى پەسكوۆ تاسس اگەنتتىگىنە بەرگەن سۇحباتىندا.
الايدا ماسكەۋ اسكەري اليانستارعا قاتىستى مۇلدە باسقا ۇستانىمدا ەكەنىن ەرەكشە اتاپ ءوتتى.
«بۇل - مۇلدە باسقا ماسەلە، ونى ءبارى جاقسى بىلەدى»، - دەدى ول.
رەسەي ۋكراينا مەن ناتو اراسىنداعى ىقتيمال وداقتاستىققا ۇزىلدى-كەسىلدى قارسى. ماسكەۋ بۇل بلوكتىڭ كەڭەيۋىن ءوزىنىڭ ۇلتتىق قاۋىپسىزدىگىنە تىكەلەي ءقاۋىپ دەپ سانايدى. رەسەي پرەزيدەنتى ۆلاديمير پۋتين ۋكراينانىڭ ناتو-عا قوسىلۋى كەنەتتەن جاسالاتىن سوققى ءقاۋپىن بىرنەشە ەسە ارتتىرادى دەپ مالىمدەگەن. سوندىقتان كييەۆتىڭ اسكەري بلوكقا كىرۋدەن باس تارتۋىن پۋتين بەيبىت كەلىسسوزدەردى باستاۋ شارتتارىنىڭ ءبىرى رەتىندە اتاعان ەدى.
ەستەرىڭىزگە سالا كەتەيىك، ۋكراينا 2022 جىلدىڭ كۇزىنە قاراي ناتو-عا جەدەلدەتىلگەن تارتىپتە كىرۋ تۋرالى ءوتىنىش بەرگەن بولاتىن. سول ۋاقىتتان بەرى اليانس ۋكراينامەن ىنتىماقتاستىقتى كۇشەيتۋ نيەتى تۋرالى بىرنەشە رەت مالىمدەگەنىمەن، ەلدىڭ مۇشەلىككە دايىن ەمەستىگىن جانە بەلگىلى ءبىر شارتتاردىڭ ورىندالۋى قاجەتتىگىن العا تارتىپ كەلەدى.
