Memleket basshysy Qasym-Jomart Toqaev aýyldy qoldaý jáne agrarlyq salany damytý maqsatynda qabyldanǵan baǵdarlamalarǵa jan-jaqty taldaý júrgizýdi tapsyrdy. Bul týraly Prezident Astanada ótken Aýyl sharýashylyǵy qyzmetkerleriniń úshinshi forýmynda málimdedi, dep habarlaidy dalanews.kz.
Prezident aýyl turǵyndarynyń ómir súrý sapasyn jaqsartý úshin qolaily jaǵdai jasaý qajettigin atap ótti. Onyń aitýynsha, sońǵy jyldary aýyl sharýashylyǵyn qoldaýǵa baǵyttalǵan kóptegen baǵdarlama qabyldanǵanymen, olardyń birqatary mazmuny jaǵynan bir-birin qaitalaidy. Aiyrmashylyǵy tek ataýynda bolýy múmkin.
«Qazirdiń ózinde "Aýyl amanaty", "Aýyl – el besigi", "Keń dala", "Bereke", "Jailaý", "Igilik", "Sybaǵa" jáne basqa da baǵdarlamalar júzege asyrylyp jatyr. Árine, bul jobalardyń barlyǵy saladaǵy ózekti máselelerdi sheshýge baǵyttalǵan. Alaida atqarylyp jatqan jumystyń tiimdiligi qandai? Mundai suraqtyń týyndaýy zańdy. Bizge baǵdarlamalar sanyn kóbeitý emes, aýyl sharýashylyǵyn sapaly damytý qajet», – dedi Memleket basshysy.
Osyǵan bailanysty Úkimetke aýyl men agrarlyq sektordy qoldaý úshin ázirlengen qujattardyń barlyǵyna keshendi taldaý júrgizý mindeti júkteldi.
Prezidenttiń pikirinshe, ár baǵdarlamanyń naqty maqsaty men mindeti bolýy kerek. Eń bastysy, qabyldanyp jatqan sharalar sharýalarǵa túsinikti bolyp, aýyldaǵy ómir sapasyn jaqsartýǵa yqpal etýge tiis. Bul másele biýdjet qarajatyn únemdeý qajettiligimen de tikelei bailanysty.
Qasym-Jomart Toqaev salaǵa jaýapty ministrliktiń derekterin de keltirdi. Ótken jyly «Aýyl – el besigi» baǵdarlamasy aiasynda 500-ge jýyq aýylda jalpy quny 173 milliard teńge bolatyn 921 joba júzege asyrylǵan. Sonymen qatar 277 eldi mekende sýmen jabdyqtaý júieleri jańǵyrtylǵan.
Memleket basshysy atqarylǵan jumystardyń naqty nátijesin tekserý qajet ekenin aitty.
«Bálkim, endi osy jumystyń naqty qorytyndysyn tekseretin ýaqyt kelgen shyǵar. Jariialanyp jatqan tsifrlarǵa senýge bola ma? Bul taqyrypty nege kóterip, egjei-tegjeili zerdelegim keledi? Buǵan deiin bizge ádemi, tipti minsiz deýge bolatyn kórinis usynylatyn. Shynymdy aitsam, bárimiz buǵan shyn júrekten qýanatynbyz. Keiin naqty statistika berilmedi degen siiaqty syltaýlardy alǵa tartyp, bul máseleni keiinge qaldyra berdik. Budan bylai mundai tásilge jol berýge bolmaidy», – dedi Prezident.
Sondai-aq Qasym-Jomart Toqaev aýyldardyń damýyna úles qosyp, turaqty jumys oryndaryn ashatyn kásiporyndardy qoldaýǵa erekshe nazar aýdarý qajettigin atap ótti.