Vladimir Iakýshev Resei Qorǵan jáne Túmen oblystaryndaǵy sý tasqynynyń aldyn alý úshin Qazaqstan óziniń sý qoimalarynda sýdy "kelisilgen túrde jiberýi kerek" degen pikir bildirdi.
"Bizde osyndai qys bolyp, onyń ústine qar da jetkilikti mólsherde jaýǵan kezde, sý qoimasynda sýdyń úlken qory jinalǵanda, sý qoimalaryna sý neǵurlym kelisilgen túrde, durys ári birkelki kelýi úshin áriptesterimizben (Qazaqstandaǵy - esk.) jumys isteý kerek", - dedi Iakýshev RBK telearnasynyń efirinde.
Onyń aitýynsha, osy máseleler sheshilgen jaǵdaida birneshe oblysta sý tasqynynyń aldyn alýǵa bolady. Ázirge Qorǵan "úlken sýǵa" daiyndalyp jatyr.
Qazaqstannyń Sý resýrstary jáne irrigatsiia ministrliginiń resmi ókili Móldir Ábdýálieva osy aqparatqa jaýap berdi.
"Vladimir Iakýshevtiń málimdemesine qatysty. Tobyl ózeniniń boiyndaǵy sý Reseiden keledi. Tiisinshe sý jiberý týraly sheshim Resei tarapynan keletin aǵynǵa sai qabyldanady.
Sondyqtan Qazaqstan Reseidegi sý tasqynyna áser etedi dep aitý durys emes. Bul shyndyqqa janaspaidy. 2 sáýirden bastap Qazaqstan jaǵy Resei tarapyna Tobyl ózeni boiynsha sý ótkizý jónindegi sheshimder týraly aqparat berip otyr.
Taraptar táýlik boiy sý aǵynynyń ulǵaiýyna nemese azaiýyna qarai málimet almasady. Sol sebepti kez-kelgen kelisilmegen áreket týraly sóz joq. Qazaqstandyq tarap Resei jaǵymen syilastyq, kórshilik áriptestik rýhynda yntymaqtastyqty ári qarai jalǵastyrýǵa, aqparat almasýǵa daiyn", - dedi ol.
Aita keteiik, Qazaqstannyń da birqatar óńirinde sý tasqyny máselesi ýshyǵyp otyr. Resmi derekterde Atyraý oblysy Qulsary qalasynda úsh myńǵa jýyq úi sýǵa ketti delinedi. Al Batys Qazaqstan oblysy Jaiyq ózeniniń deńgeii kóterilýin qatań baqylap otyr.
"Sý Resei Federatsiiasynyń tarapynan keledi, onda sý tasqynyna bailanysty Iriklin sý qoimasyna jiberilip jatyr. RF tarapynan Iriklin sý qoimasynyń sýyn aǵyzý birtindep azaiyp keledi. Resei tarapynyń aqparaty boiynsha Irikla sý qoimasyna aǵyn jyldamdyǵy - 1 485 m3/sek", - dedi Batys Qazaqstan oblysy TJD bastyǵynyń mindetin atqarýshy polkovnik Rýslan Qasybaev OKQ alańynda ótken brifingte buǵan deiin.
Keiingi derekterge súiensek, sý tasqyny kezeńi bastalǵaly óńirde barlyǵy 12 970 adam evakýatsiialandy, onyń ishinde 5 400-ge jýyǵy bala. 1155 turǵyn úi sý astynda qaldy, onyń 732-sine turǵyndar qaityp keldi.
Al "QazAvtoJol" UK AQ ókilderi respýblikalyq joldarda 706 tehnika men 1680 adam sý tasqynynyń aldyn alý boiynsha jumys istep jatqanyn málimdedi.
Sondai-aq, ýaqytsha ornalastyrý pýnktterinde 7 myńnan asa adam bar degen derekter de bar.
