ۆلاديمير ياكۋشيەۆ رەسەي قورعان جانە تۇمەن وبلىستارىنداعى سۋ تاسقىنىنىڭ الدىن الۋ ءۇشىن قازاقستان ءوزىنىڭ سۋ قويمالارىندا سۋدى "كەلىسىلگەن تۇردە جىبەرۋى كەرەك" دەگەن پىكىر ءبىلدىردى.

"بىزدە وسىنداي قىس بولىپ، ونىڭ ۇستىنە قار دا جەتكىلىكتى مولشەردە جاۋعان كەزدە، سۋ قويماسىندا سۋدىڭ ۇلكەن قورى جينالعاندا، سۋ قويمالارىنا سۋ نەعۇرلىم كەلىسىلگەن تۇردە، دۇرىس ءارى بىركەلكى كەلۋى ءۇشىن ارىپتەستەرىمىزبەن (قازاقستانداعى - ەسك.) جۇمىس ىستەۋ كەرەك"، - دەدى ياكۋشيەۆ ربك تەلەارناسىنىڭ ەفيرىندە.

ونىڭ ايتۋىنشا، وسى ماسەلەلەر شەشىلگەن جاعدايدا بىرنەشە وبلىستا سۋ تاسقىنىنىڭ الدىن الۋعا بولادى. ازىرگە قورعان "ۇلكەن سۋعا" دايىندالىپ جاتىر.

قازاقستاننىڭ سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا وسى اقپاراتقا جاۋاپ بەردى.

"ۆلاديمير ياكۋشيەۆتىڭ مالىمدەمەسىنە قاتىستى. توبىل وزەنىنىڭ بويىنداعى سۋ رەسەيدەن كەلەدى. تيىسىنشە سۋ جىبەرۋ تۋرالى شەشىم رەسەي تاراپىنان كەلەتىن اعىنعا ساي قابىلدانادى.

سوندىقتان قازاقستان رەسەيدەگى سۋ تاسقىنىنا اسەر ەتەدى دەپ ايتۋ دۇرىس ەمەس. بۇل شىندىققا جاناسپايدى. 2 ساۋىردەن باستاپ قازاقستان جاعى رەسەي تاراپىنا توبىل وزەنى بويىنشا سۋ وتكىزۋ جونىندەگى شەشىمدەر تۋرالى اقپارات بەرىپ وتىر.

تاراپتار تاۋلىك بويى سۋ اعىنىنىڭ ۇلعايۋىنا نەمەسە ازايۋىنا قاراي مالىمەت الماسادى. سول سەبەپتى كەز-كەلگەن كەلىسىلمەگەن ارەكەت تۋرالى ءسوز جوق. قازاقستاندىق تاراپ رەسەي جاعىمەن سىيلاستىق، كورشىلىك ارىپتەستىك رۋحىندا ىنتىماقتاستىقتى ءارى قاراي جالعاستىرۋعا، اقپارات الماسۋعا دايىن"، - دەدى ول.

ايتا كەتەيىك، قازاقستاننىڭ دا ءبىرقاتار وڭىرىندە سۋ تاسقىنى ماسەلەسى ۋشىعىپ وتىر. رەسمي دەرەكتەردە اتىراۋ وبلىسى قۇلسارى قالاسىندا ءۇش مىڭعا جۋىق ءۇي سۋعا كەتتى دەلىنەدى. ال باتىس قازاقستان وبلىسى جايىق وزەنىنىڭ دەڭگەيى كوتەرىلۋىن قاتاڭ باقىلاپ وتىر.

"سۋ رەسەي فەدەراسياسىنىڭ تاراپىنان كەلەدى، وندا سۋ تاسقىنىنا بايلانىستى يريكلين سۋ قويماسىنا جىبەرىلىپ جاتىر. رف تاراپىنان يريكلين سۋ قويماسىنىڭ سۋىن اعىزۋ بىرتىندەپ ازايىپ كەلەدى. رەسەي تاراپىنىڭ اقپاراتى بويىنشا يريكلا سۋ قويماسىنا اعىن جىلدامدىعى - 1 485 م3/سەك"، - دەدى باتىس قازاقستان وبلىسى تجد باستىعىنىڭ مىندەتىن اتقارۋشى پولكوۆنيك رۋسلان قاسىبايەۆ وكق الاڭىندا وتكەن بريفينگتە بۇعان دەيىن.

كەيىنگى دەرەكتەرگە سۇيەنسەك، سۋ تاسقىنى كەزەڭى باستالعالى وڭىردە بارلىعى 12 970 ادام ەۆاكۋاسيالاندى، ونىڭ ىشىندە 5 400-گە جۋىعى بالا. 1155 تۇرعىن ءۇي سۋ استىندا قالدى، ونىڭ 732-سىنە تۇرعىندار قايتىپ كەلدى.

ال "قازاۆتوجول" ۇك اق وكىلدەرى رەسپۋبليكالىق جولداردا 706 تەحنيكا مەن 1680 ادام سۋ تاسقىنىنىڭ الدىن الۋ بويىنشا جۇمىس ىستەپ جاتقانىن مالىمدەدى.

سونداي-اق، ۋاقىتشا ورنالاستىرۋ پۋنكتتەرىندە 7 مىڭنان اسا ادام بار دەگەن دەرەكتەر دە بار.