Qazaqstanda munai óndirý kólemi Kaspii qubyr konsortsiýmynyń (KQK) jumysyn ýaqytsha toqtatýyna bailanysty kúrt tómendedi. Reuters agenttiginiń málimetinshe, 22 shildede eldegi munai men gaz kondensatyn óndirý kólemi táýligine 21,3%-ǵa azaiǵan, dep habarlaidy dalanews.kz.
Agenttik salalyq eki derekkózge silteme jasap, táýliktik óndiris kólemi 215,6 myń tonnaǵa (shamamen 1,63 mln barrel) deiin tómendegenin habarlady. Al shilde aiynyń basynan bergi ortasha kórsetkish 274 myń tonna nemese 2,07 mln barreldi quraǵan.
Eń úlken tómendeý Teńiz ken ornynda tirkelgen. Reuters derekkózine sáikes, munda táýliktik munai óndirý kólemi 925 myń barrelden 406 myń barrelge deiin qysqarǵan. Material jariialanǵan sátte Qazaqstannyń Energetika ministrligi men «Teńizshevroil» kompaniiasy jaǵdaiǵa qatysty pikir bildirmegen.
KQK arqyly Qazaqstan eksporttaityn munaidyń 80%-dan astamy tasymaldanady. Bul qubyrmen Teńiz, Qashaǵan jáne Qarashyǵanaq ken oryndarynyń munaiy jetkiziledi. Sondyqtan qubyr jumysynyń kez kelgen úzilisi eldegi munai óndirý kólemine birden áser etedi.
Reuters derekterine súiensek, táýliktik óndiris shamamen 440 myń barrelge azaiǵan. Brent markaly munai baǵasy bir barreline 69–70 dollar shamasynda bolǵanyn eskersek, Qazaqstan bir kúnniń ózinde shamamen 30–31 mln dollar kólemindegi eksporttyq túsimnen qaǵylǵan.
Bul memleket biýdjetiniń tikelei shyǵyny bolmasa da, KTK jumysynyń uzaqqa sozylǵan toqtaýy saldarynan biýdjetke túsetin salyqtar, eksporttyq bajdar jáne munai sektorynan túsetin ózge de kirister azaiýy múmkin.
