Қазақстанда мұнай өндіру көлемі Каспий құбыр консорциумының (КҚК) жұмысын уақытша тоқтатуына байланысты күрт төмендеді. Reuters агенттігінің мәліметінше, 22 шілдеде елдегі мұнай мен газ конденсатын өндіру көлемі тәулігіне 21,3%-ға азайған, деп хабарлайды dalanews.kz.
Агенттік салалық екі дереккөзге сілтеме жасап, тәуліктік өндіріс көлемі 215,6 мың тоннаға (шамамен 1,63 млн баррель) дейін төмендегенін хабарлады. Ал шілде айының басынан бергі орташа көрсеткіш 274 мың тонна немесе 2,07 млн баррельді құраған.
Ең үлкен төмендеу Теңіз кен орнында тіркелген. Reuters дереккөзіне сәйкес, мұнда тәуліктік мұнай өндіру көлемі 925 мың баррельден 406 мың баррельге дейін қысқарған. Материал жарияланған сәтте Қазақстанның Энергетика министрлігі мен «Теңізшевройл» компаниясы жағдайға қатысты пікір білдірмеген.
КҚК арқылы Қазақстан экспорттайтын мұнайдың 80%-дан астамы тасымалданады. Бұл құбырмен Теңіз, Қашаған және Қарашығанақ кен орындарының мұнайы жеткізіледі. Сондықтан құбыр жұмысының кез келген үзілісі елдегі мұнай өндіру көлеміне бірден әсер етеді.
Reuters деректеріне сүйенсек, тәуліктік өндіріс шамамен 440 мың баррельге азайған. Brent маркалы мұнай бағасы бір барреліне 69–70 доллар шамасында болғанын ескерсек, Қазақстан бір күннің өзінде шамамен 30–31 млн доллар көлеміндегі экспорттық түсімнен қағылған.
Бұл мемлекет бюджетінің тікелей шығыны болмаса да, КТК жұмысының ұзаққа созылған тоқтауы салдарынан бюджетке түсетін салықтар, экспорттық баждар және мұнай секторынан түсетін өзге де кірістер азаюы мүмкін.
