Kostenko shahtasyndaǵy jarylysqa qatysty qylmystyq is sotqa jiberildi, dep habarlaıdy Dalanews.kz.
Qaraǵandy oblysynyń prokýratýrasy Kostenko shahtasynda kenshilerdiń qaza tabýyna qatysty 106 tomdyq qylmystyq isti sotqa jiberdi.
Sotqa deıingi tergeýdi Bas prokýratýranyń arnaıy prokýrorlary İshki ister mınıstrligi, Sybaılas jemqorlyqqa qarsy is-qımyl agenttigi, Qarjylyq monıtorıń agenttigi jáne Tótenshe jaǵdaılar mınıstrligi qyzmetkerleriniń qatysýymen júrgizdi.
Tergeý barysynda jazataıym oqıǵaǵa taý-ken jumystary kezinde qaýipsizdik erejeleriniń jappaı buzylýy sebep bolǵany anyqtaldy. Kómir óndirý alańyndaǵy jarylys, shoǵyrlanýy ruqsat etilgen standarttardan aıtarlyqtaı asyp ketken kómir shańynyń jarylystarynyń tizbekti reaksıasyn týdyryp, 46 kenshi qaza taýyp, 28 kenshi jaraqattandy.
Shahta basshylyǵy men ınjenerlik-tehnıkalyq qyzmetkerler qatarynan 10 adam qylmystyq jaýapkershilikke tartyldy. Barlyǵy qamaýda. Olarǵa Qazaqstan Respýblıkasy Qylmystyq kodeksiniń 277-babynyń 3-bóligi boıynsha («taý-ken jumystary kezinde qaýipsizdik erejelerin buzý») aıyp taǵyldy, atalǵan bap boıynsha 8 jylǵa deıin bas bostandyǵynan aıyrý jazasy qarastyrylǵan.
İs boıynsha 74 adam jábirlenýshi retinde tanyldy.
Materıaldar negizi boıynsha qaraý úshin Qaraǵandy qalasynyń Álıhan Bókeıhan aýdanynyń aýdandyq sotyna jiberildi.
