كوستەنكو شاحتاسىنداعى جارىلىسقا قاتىستى قىلمىستىق ءىس سوتقا جىبەرىلدى، دەپ حابارلايدى Dalanews.kz.
قاراعاندى وبلىسىنىڭ پروكۋراتۋراسى كوستەنكو شاحتاسىندا كەنشىلەردىڭ قازا تابۋىنا قاتىستى 106 تومدىق قىلمىستىق ءىستى سوتقا جىبەردى.
سوتقا دەيىنگى تەرگەۋدى باس پروكۋراتۋرانىڭ ارنايى پروكۋرورلارى ىشكى ىستەر مينيسترلىگى، سىبايلاس جەمقورلىققا قارسى ءىس-قيمىل اگەنتتىگى، قارجىلىق مونيتورينگ اگەنتتىگى جانە توتەنشە جاعدايلار مينيسترلىگى قىزمەتكەرلەرىنىڭ قاتىسۋىمەن جۇرگىزدى.
تەرگەۋ بارىسىندا جازاتايىم وقيعاعا تاۋ-كەن جۇمىستارى كەزىندە قاۋىپسىزدىك ەرەجەلەرىنىڭ جاپپاي بۇزىلۋى سەبەپ بولعانى انىقتالدى. كومىر ءوندىرۋ الاڭىنداعى جارىلىس، شوعىرلانۋى رۇقسات ەتىلگەن ستاندارتتاردان ايتارلىقتاي اسىپ كەتكەن كومىر شاڭىنىڭ جارىلىستارىنىڭ تىزبەكتى رەاكسياسىن تۋدىرىپ، 46 كەنشى قازا تاۋىپ، 28 كەنشى جاراقاتتاندى.
شاحتا باسشىلىعى مەن ينجەنەرلىك-تەحنيكالىق قىزمەتكەرلەر قاتارىنان 10 ادام قىلمىستىق جاۋاپكەرشىلىككە تارتىلدى. بارلىعى قاماۋدا. ولارعا قازاقستان رەسپۋبليكاسى قىلمىستىق كودەكسىنىڭ 277-بابىنىڭ 3-بولىگى بويىنشا («تاۋ-كەن جۇمىستارى كەزىندە قاۋىپسىزدىك ەرەجەلەرىن بۇزۋ») ايىپ تاعىلدى، اتالعان باپ بويىنشا 8 جىلعا دەيىن باس بوستاندىعىنان ايىرۋ جازاسى قاراستىرىلعان.
ءىس بويىنشا 74 ادام جابىرلەنۋشى رەتىندە تانىلدى.
ماتەريالدار نەگىزى بويىنشا قاراۋ ءۇشىن قاراعاندى قالاسىنىڭ ءاليحان بوكەيحان اۋدانىنىڭ اۋداندىق سوتىنا جىبەرىلدى.
