Prezident Qasym-Jomart Toqaev VI Dúniejúzilik kóshpendiler oiyndarynda joǵary nátije kórsetken qazaqstandyq sportshylar men olardyń jattyqtyrýshylaryn quttyqtap, birqatar azamatqa memlekettik nagradalar tabystady, dep habarlaidy dalanews.kz.
Memleket basshysy marapattaý rásimin Astanadaǵy Táýelsizdik saraiynda ótkizip, sportshylar men jattyqtyrýshylardy Dúniejúzilik kóshpendiler oiyndaryndaǵy nátijelerimen quttyqtady. Ol ulttyq quramanyń sheberligin joǵary baǵalap, sportshylardyń ulttyq sport túrlerindegi Qazaqstannyń bedelin arttyrýǵa qosqan úlesin atap ótti.
Prezident jalpykomandalyq eseptegi jeńistiń búkil el úshin maqtanysh bolǵanyn aitty.
«100-den astam eldiń sportshylarymen básekede kók bairaǵymyzdy biik kóterip, halqymyzdyń laiyqty ókilderi boldyńyzdar. Ulttyq quramamyz otandastarymyzdyń úmitin tolyq aqtady dep nyq senimmen aita alamyn. Memleket basshysy retinde búkil Qazaqstandy jigerlendirgen jeńisterińiz úshin shynaiy alǵysymdy bildiremin. Búkil halqymyz sportshylarymyzǵa ystyq yqylaspen qoldaý kórsetip, sizder úshin jankúier boldy», – dedi Qasym-Jomart Toqaev.
Oiyndardyń qorytyndysy boiynsha qazaqstandyq sportshylar 74 medal, onyń ishinde 32 altyn medal jeńip aldy.
«Bul jetistik halqymyzdyń qaisar minezin, rýhynyń asqaqtyǵyn jáne jeńiske degen myzǵymas jigerin aiqyn kórsetti. Sporttyń eń mańyzdy missiialarynyń biri – ózara qurmet pen qoldaýdy qalyptastyrý, halyqtar arasyndaǵy dostyqty nyǵaitý. Bul aýqymdy sporttyq shara joǵary deńgeide uiymdastyryldy jáne onyń nátijeleri ádil boldy. Osy oraida Qyrǵyz Respýblikasynyń Prezidentine rizashylyǵymdy bildiremin», – dedi Prezident.
Memleket basshysy búginde búkil álemniń nazary túrki halyqtaryna aýyp otyrǵanyn aityp, kóshpendiler oiyndaryn odan ári damytý jáne keńinen nasihattaý úshin kúsh biriktirýge shaqyrdy.
«Qazaqstan bul ortaq iske óz úlesin qosýǵa árdaiym daiyn. Ata-babalarymyz eki baýyrlas halyqqa qaldyrǵan eń qymbat mura – ózara qurmet pen máńgilik dostyq. Biz osy danalyqqa negizdelgen ósietti qasterleýimiz kerek. Biz Uly dala órkenietiniń zańdy muragerimiz. Batyr babalarymyz bizge ulan-ǵaiyr dalany amanat etti. Olar ózderiniń dástúrleri men rýhani qundylyqtaryn muraǵa qaldyrdy. Osy asyl qazynany kózdiń qarashyǵyndai saqtap, keler urpaqqa jetkizý – ortaq mindetimiz. Bul qasietti missiiany ishki qadir-qasietimizdi, biik mádenietimiz ben ádeptiligimizdi saqtai otyryp atqarýymyz kerek», – dedi Qasym-Jomart Toqaev.
Prezident Qazaqstannyń bolashaqqa baǵdarlanǵan, aldyna naqty maqsattar men mindetter qoiǵan memleket retinde turaqty damýyn jalǵastyryp kele jatqanyn atap ótti.
Onyń aitýynsha, ulttyq sportpen ainalysatyn jastardan bastap sportshylarǵa, memlekettik qyzmetshiler men kásipkerlerge, dárigerler men muǵalimderge, stýdentter men ǵalymdarǵa, jumysshylar men basshylarǵa, áskeri qyzmetshiler men túrli organdardyń qyzmetkerlerine deiin barlyǵy joǵary mádeniet, sabyrlylyq pen ishki baisaldylyq tanytýy kerek.
«Bos sóz ben dańǵoilyqtan aýlaq bolǵanymyz jón. Naǵyz progressivti qoǵamdy tek osylai qura alamyz», – dedi Prezident.
Memleket basshysy ulttyq sportty damytý Úkimet pen ákimdikterdiń mańyzdy mindetteriniń biri ekenin aitty.
«Qazir bul salada 30-dan astam arnaiy mekeme jumys isteidi. Astanada Ulttyq sport ýniversiteti ashyldy. Bul oqý orny sport salasyndaǵy mamandardyń kásibi deńgeiin arttyrýǵa aitarlyqtai úles qosady dep senemiz. Ulttyq jáne at sporty túrleri ortalyǵy da óz jumysyn sátti bastady», – dedi ol.
Prezidenttiń aitýynsha, Qazaqstanda jyl saiyn qazaq kúresi, toǵyzqumalaq, asyq atý, kókpar, báige jáne basqa da ulttyq sport túrlerinen myńnan astam jarys ótkiziledi.
Sonymen qatar Ulttyq sport túrleri festivali, «Aq bidai» aýyl sport oiyndary, «Qazaqstan barysy» týrniri turaqty túrde uiymdastyrylady.
«Eń bastysy, ulttyq sport túrleriniń mártebesi zań júzinde olimpiadalyq sport túrlerimen teńestirildi. Búginde qazaq sportynyń bedeli buryn-sońdy bolmaǵan deńgeide joǵary. Muny búkil álem moiyndap otyr. Bizdiń sportshylarymyz únemi úzdikter qatarynda», – dedi Toqaev.
Memleket basshysy jaqynda qazaqstandyq tanymal sportshy Elena Rybakinanyń tennisten álemniń birinshi raketkasy atanǵanyn da atap ótti.
«Bul – shyn máninde, asa iri jetistik. Men Elena Rybakinany eńbekqorlyǵy, sheberligi jáne joǵary deńgeidegi jeke mádenieti úshin quttyqtadym», – dedi Prezident.
Qasym-Jomart Toqaev otandyq sporttaǵy qazirgi jetistikter Úkimet pen salalyq ministrliktiń júieli ári dáiekti jumysynyń nátijesi ekenin atap ótti. Sonymen birge alda atqarylatyn jumys áli de kóp ekenin aitty.
Prezident Qazaqstanda kóptegen halyqaralyq sporttyq jarystar ótip jatqanyn atap ótti. Biyl Astanada dástúrli sport pen tsifrlyq tehnologiialardy biriktirgen biregei «Bolashaq oiyndary» uiymdastyryldy.
«Kelesi jyly elordamyzda birden jeti álem chempionaty ótedi. Aldymyzda aýqymdy jumys tur. Degenmen mundai halyqaralyq sharalardyń barlyǵy elimizdiń bedeli men abyroiyn nyǵaitý úshin asa qajet. Al 2029 jyly Almatyda X Qysqy Aziia oiyndary ótedi. Osy iri jarystardyń barlyǵyn eń joǵary deńgeide uiymdastyrýymyz kerek», – dedi Memleket basshysy.
Sóziniń sońynda Prezident sportshylardyń jeńisi jas urpaqqa motivatsiia berip, olardy jigerlendiretinin aitty.
«Jastar sizderge qarap boi túzeidi. Bul – úlken mártebe ǵana emes, zor jaýapkershilik. Jeńimpaz, chempion bolý – bir bólek, ózgelerge chempion degen atqa tolyq laiyqty úlgi bolý – múldem basqa nárse. Jastardyń boiynda tabandylyqty, tózimdilik pen shydamdylyqty ǵana emes, ádeptilik, mádeniet pen tártipti de qalyptastyrý óte mańyzdy. Sonda ǵana jastarymyz táni de, rýhy da myqty azamat bolyp ósedi», – dedi Qasym-Jomart Toqaev.
Rásim barysynda Memleket basshysy VI Dúniejúzilik kóshpendiler oiyndarynda joǵary nátije kórsetken sportshylarǵa, sondai-aq jarystardy uiymdastyrý men ótkizýge erekshe úles qosqan azamattarǵa memlekettik nagradalar tabystady.
