Irandaǵy qazaq diasporasynyń ókili, Iran qazaqtary qaýymdastyǵynyń tóraǵasy Taiyp Begei Qazaqstan Prezidenti Qasym-Jomart Toqaevqa úndeý joldady. Ol Irandaǵy tótenshe jaǵdai men kóshi-qon máselelerine bailanysty Memleket basshysynan kómek surady, dep habarlaidy Dalanews.kz.
“Iranda tótenshe jaǵdai ekenin bilesizder. Sizge Iran qazaqtary týraly shaǵyn aqparat bereiin. Bizdiń munda kelgenimizge 100 jyl boldy. Biraq óz salt-dástúr, tilimizdi, mádenietimizdi saqtadyq. Qudaiǵa shúkir, 91-den beri Qazaqstan Respýblikasy táýelsizdik alyp, bizdiń Iran qazaqtary da 93-ten óz eline, ata jurtyna kóship bastady. Bul kóshte 30 jyldyń ishinde jylda 30 úi, 20 úi, 50 úi óz ata jurtyna kóship júrdi”, — deidi ol.
Alaida onyń aitýynsha, keiingi jyldary qazaq diasporasynyń tarihi Otanyna oralýyna birqatar kedergi týyndaǵan.
“Iran qazaqtarynyń qujattarynyń ishine “qazaq” degen ultymyzdy jazǵan joq. Tek qazaqtar emes, basqa ulttardyń qujattarynyń ishine de jazǵan joq. Sondyqtan biz buryn Qazaqstanǵa barýǵa Irandaǵy Qazaqstan Respýblikasynyń elshiligi jáne konsýldyǵy bizge bir anyqtama beretin edi. Biraq 4 jyl boldy, sol toqtady. Endi barýǵa “qazaqtyǵyńyzdy dáleldetińiz” deidi. Bul bizge kóshýge úlken problema bolyp júr”, — dep qosty ol.
Onyń aitýynsha, buǵan deiin Iran qazaqtaryna úsh jylǵa tegin diaspora vizasy beriletin. Alaida qazir bul da toqtaǵan. Sonyń saldarynan týystyq bailanystar úzilip, Qazaqstanǵa baryp-kelý múmkindigi shektelip otyr.
“Irandaǵy qazaqtardyń Mańǵystaýda, Qazaqstannyń basqa da óńirlerinen aǵaiyndary, týystary bar. Olardyń týystaryna barýy qiyn másele bolyp tur”, — dedi ol.
Osyǵan bailanysty ol Qazaqstan Prezidentine úndeý jasady.
“Endi biz, Iran qazaqtary, Qasym-Jomart Toqaevtan kómek suraimyz. Bizge qaita anyqtama men diaspora vizan berse, basqa máseleni Qazaqstanǵa baryp sheshemiz”, – dedi ol.
