QR Prezıdenti Qasym-Jomart Kemeluly Toqaevtyń tapsyrmasy boıynsha Memlekettik hatshy Qyrymbek Kósherbaev Túrkistan oblysyna jumys saparymen kelip, Táýelsizdiktiń 30 jyldyǵyna arnalǵan saltanatty is-sharaǵa qatysty. Túrkistan oblysynyń ákimi Ómirzaq Shókeev pen Túrkistan óńiriniń zıaly qaýym ókilderi, eńbegimen daralanǵan azamattary da merekelik jıynda Táýelsizdiktiń arqasynda qol jetken jetistikter týraly oı qozǵady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Qyrymbek Kósherbaev Qazaqstannyń Táýelsizdik jyldarynda jetken jetistikterin, elimizdiń basynan ótkergen túrli qıyndyqtar men synaqtar jaıynda aıtyp ótti. Memleketimizdiń nyǵaıyp, áleýmettik-ekonomıkalyq damýyna, álemdik arenada ózindik oryn alýyna QR Tuńǵysh Prezıdenti – Elbasy Nursultan Ábishuly Nazarbaevtyń eren eńbek sińirgenin jetkizdi. Osyndaı jasampaz joldy Memleket basshysy Qasym-Jomart Kemeluly Toqaev «Sabaqtastyq. Ádilet. Órleý» prınsıpimen, «Halyq únine qulaq asatyn memleket» tujyrymdamasymen laıyqty jalǵastyryp jatqanyna toqtaldy.

– Táýelsizdik jyldary elimizdiń shekarasy bekemdeldi. Qazaqstan Qarýly Kúshteriniń qorǵanys qabileti  nyǵaıdy. Álemniń 138 elimen dıplomatıalyq qarym-qatynas ornattyq. Osy jyldar ishinde elimizdiń ishki jalpy ónimi 17 ese ósti. Birikken Ulttar Uıymy, IýNESKO, Eýropadaǵy qaýipsizdik jáne yntymaqtastyq uıymy  sıaqty iri halyqaralyq uıymdarǵa múshe bolyp, tórelik aıtyp, tórine shyqtyq. Memleketimiz álem halyqtary aldynda zor bedelge ıe boldy, – dedi Memlekettik hatshy.

Budan bólek, Qyrymbek Kósherbaev Táýelsizdik jyldarynda Qazaqstannyń jańa kelbeti qalyptasqanyn, az ǵana ýaqytta ǵasyrǵa para-par is atqarylǵanyn jetkizdi.

– Osy otyz jylda  memleket jańǵyryp, ult qaıta túledi. Táýelsizdik jyldary boı kótergen ǵajaıyp elorda Otanymyzdyń júregine, Táýelsizdigimizdiń tiregine aınaldy. Halqymyz maqtan etetin elimizdiń barlyq óńirlerinde de ulanǵaıyr jasampazdyq ister atqaryldy. Munyń ózi bizdiń qýatty el ekenimizdi pash etti. Sizderdiń oblystaryńyz da basqa óńirler sıaqty el ekonomıkasynyń damýyna jyldan-jylǵa úles qosyp keledi, – dedi Qyrymbek Eleýuly.

Merekelik jıynda Túrkistan oblysynyń ákimi Ómirzaq Shókeev jurtshylyqty Táýelsizdigimizdiń 30 jyldyǵymen quttyqtap, Túrkistan óńirindegi oń ózgeristerge toqtalyp ótti. Táýelsizdiktiń uly qundylyq ekenin jetkizdi.

Jıynda ártúrli salada memleketimizdiń mereıin asyryp júrgen azamattar QR Prezıdentiniń Jarlyǵymen memlekettik nagradalarmen marapattaldy.

Táýelsizdik merekesine arnalǵan kesh Qazaqstannyń jáne Túrki elderiniń ánshileriniń konserttik baǵdarlamasyna ulasty.