قىرىمبەك كوشەربايەۆ قازاقستاننىڭ تاۋەلسىزدىك جىلدارىندا جەتكەن جەتىستىكتەرىن، ەلىمىزدىڭ باسىنان وتكەرگەن ءتۇرلى قيىندىقتار مەن سىناقتار جايىندا ايتىپ ءوتتى. مەملەكەتىمىزدىڭ نىعايىپ، الەۋمەتتىك-ەكونوميكالىق دامۋىنا، الەمدىك ارەنادا وزىندىك ورىن الۋىنا ق ر تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ ەرەن ەڭبەك سىڭىرگەنىن جەتكىزدى. وسىنداي جاسامپاز جولدى مەملەكەت باسشىسى قاسىم-جومارت كەمەل ۇلى توقايەۆ «ساباقتاستىق. ادىلەت. ورلەۋ» پرينسيپىمەن، «حالىق ۇنىنە قۇلاق اساتىن مەملەكەت» تۇجىرىمداماسىمەن لايىقتى جالعاستىرىپ جاتقانىنا توقتالدى.
– تاۋەلسىزدىك جىلدارى ەلىمىزدىڭ شەكاراسى بەكەمدەلدى. قازاقستان قارۋلى كۇشتەرىنىڭ قورعانىس قابىلەتى نىعايدى. الەمنىڭ 138 ەلىمەن ديپلوماتيالىق قارىم-قاتىناس ورناتتىق. وسى جىلدار ىشىندە ەلىمىزدىڭ ىشكى جالپى ءونىمى 17 ەسە ءوستى. بىرىككەن ۇلتتار ۇيىمى، يۋنەسكو، ەۋروپاداعى قاۋىپسىزدىك جانە ىنتىماقتاستىق ۇيىمى سياقتى ءىرى حالىقارالىق ۇيىمدارعا مۇشە بولىپ، تورەلىك ايتىپ، تورىنە شىقتىق. مەملەكەتىمىز الەم حالىقتارى الدىندا زور بەدەلگە يە بولدى، – دەدى مەملەكەتتىك حاتشى.
بۇدان بولەك، قىرىمبەك كوشەربايەۆ تاۋەلسىزدىك جىلدارىندا قازاقستاننىڭ جاڭا كەلبەتى قالىپتاسقانىن، از عانا ۋاقىتتا عاسىرعا پارا-پار ءىس اتقارىلعانىن جەتكىزدى.
– وسى وتىز جىلدا مەملەكەت جاڭعىرىپ، ۇلت قايتا تۇلەدى. تاۋەلسىزدىك جىلدارى بوي كوتەرگەن عاجايىپ ەلوردا وتانىمىزدىڭ جۇرەگىنە، تاۋەلسىزدىگىمىزدىڭ تىرەگىنە اينالدى. حالقىمىز ماقتان ەتەتىن ەلىمىزدىڭ بارلىق وڭىرلەرىندە دە ۇلانعايىر جاسامپازدىق ىستەر اتقارىلدى. مۇنىڭ ءوزى ءبىزدىڭ قۋاتتى ەل ەكەنىمىزدى پاش ەتتى. سىزدەردىڭ وبلىستارىڭىز دا باسقا وڭىرلەر سياقتى ەل ەكونوميكاسىنىڭ دامۋىنا جىلدان-جىلعا ۇلەس قوسىپ كەلەدى، – دەدى قىرىمبەك ەلەۋ ۇلى.
مەرەكەلىك جيىندا تۇركىستان وبلىسىنىڭ اكىمى ءومىرزاق شوكەيەۆ جۇرتشىلىقتى تاۋەلسىزدىگىمىزدىڭ 30 جىلدىعىمەن قۇتتىقتاپ، تۇركىستان وڭىرىندەگى وڭ وزگەرىستەرگە توقتالىپ ءوتتى. تاۋەلسىزدىكتىڭ ۇلى قۇندىلىق ەكەنىن جەتكىزدى.
جيىندا ءارتۇرلى سالادا مەملەكەتىمىزدىڭ مەرەيىن اسىرىپ جۇرگەن ازاماتتار ق ر پرەزيدەنتىنىڭ جارلىعىمەن مەملەكەتتىك ناگرادالارمەن ماراپاتتالدى.
تاۋەلسىزدىك مەرەكەسىنە ارنالعان كەش قازاقستاننىڭ جانە تۇركى ەلدەرىنىڭ انشىلەرىنىڭ كونسەرتتىك باعدارلاماسىنا ۇلاستى.
