Taýar sapasy men qaýipsizdigin qadaǵalaý komıteti halyqqa qoljetimdi baǵada test jasaıtyn "Suńqar" medortalyǵyn sotqa bermek dep habarlaıdy Dalanews.kz vlast.kz-ke silteme jasap.
Komıtet ókilderi "ortalyqtyń buǵan arnalǵan tıisti ruqsaty joq" deıdi. Al "Suńqar" basshylyǵynyń pikirinshe bul daýdyń artynda múdde qaqtyǵysy tur.
Almaty qalasy Áýezov aýdanynyń Taýar sapasy men qaýipsizdigin qadaǵalaý basqarmasy medortalyqqa hat joldap, ol hatta: "Suńqardyń" koronavırýsty anyqtaıtyn testileýi jaramsyz ekenin, sebebi buǵan aǵzadaǵy patogenderdiń 2 tobymen jumys isteıtin arnaıy komısıanyń ruqsat bermegenin" jazǵan. Osyǵan baılanysty isti sotqa jetkizbeı COVID-19-ǵa test qabyldaýdy toqtatýdy buıyrǵan.
Al medortalyq bolsa koronavırýs ınfeksıasyna test qabyldaýdy jalǵastyrýda.
"Testileýdi toqtatqan joqpyz. Nege? Sebebi, biz bul talapty negizsiz dep sanaımyz. Taýar sapasy men qaýipsizdigin qadaǵalaý komıteti "Suńqardyń" testileýge arnalǵan tıisti ruqsaty joq" deıdi. Bul ruqsatty olar ózderi beredi ǵoı. Osy aptada Taýar sapasy men qaýipsizdigin qadaǵalaý komıtetiniń Ulttyq saraptama ortalyǵy quny 11 500 teńge turatyn aqylaý testileýdi bastap ketti.
Bizdiń baǵa budan tómen. 8500 teńge. Túptep kelgende komıtet bizdi aıaqtan shalyp, jumysymyzǵa ákimshilik turǵydan kedergi keltirýde. Munyń artynda múdde qaqtyǵysy tur.
Ruqsat berý úshin komıtet ókilderi ózinen áldeqaıda arzan baǵada test jasaıtyn básekelesiniń zerthanasyn ádil baǵalaýǵa tıis bolady.
Ekinshi másele, dál qazir testileýdi toqtatý esh múmkin emes. Sebebi test kezeginde turǵan adam kóp. Kópshiligine jumysqa shyǵý kerek, al jumys orny KVI synamasyn talap etetini belgili. Keıbireýler vırýs juqtyryp alýy múmkin, alaıda ony zerthanalyq negizde anyqtaý qajet.
Sosyn testileýdi bir ǵana ortalyq ótkizgeni durys emes, bir ortalyqtyń synamasy árkezde anyq bola bermeıdi. Eger bizdi sotqa tartsa, óz quqyǵymyzdy qorǵaýǵa kúsh salamyz", – deıdi "Suńqar" medortalyǵynyń mamany Aızada Kerimqulova.
Almaty qalasyda test tapsyratyn oryn tapshy. Densaýlyq saqtaý mınıstrli testileýge arnalǵan oryndardy anyqtaý máselesin túbegeıli sheshe alǵan joq deıdi ortalyq ókilderi.
Medortalyq ázir kúnine 120-150 test jasaýda.
