Mınıstrdiń aıtýynsha, sońǵy 14 kúnde Qazaqstanda aýrý juqtyrǵandar ósimi 35 paıyzǵa tómendegen. Al sońǵy aptada aýrýshańdyq deńgeıi 14 paıyzǵa, ıaǵnı aptasyna 31 myńnan 25 myń adamǵa deıin azaıǵan.
"Dúnıejúzilik densaýlyq saqtaý uıymynyń baǵalaýynsha, elimizde reprodýktıvti san sońǵy 4 apta boıy tómen, bul indettiń baqylaýda ekenin bildiredi jáne aýrý juqtyrý deńgeıi turaqty túrde tómendep keledi", - dedi Soı úkimet otyrysynda.
Mınıstr epıdemıologıalyq jaǵdaıdy baǵalaý matrısasynda da oń úrdis baıqalyp otyrǵanyn atap ótti.
Soı málimetinshe, sońǵy eki aptada 5 óńir "qyzyl" aımaqtan "saryǵa" aýysqan, atap aıtqanda: Shyǵys Qazaqstan, Jambyl, Qyzylorda, Batys Qazaqstan jáne Soltústik Qazaqstan oblystary.
"Jasyl" aımaqta Túrkistan oblysy ǵana tur. Qalǵan 11 óńir "qyzyl" aımaqta.
Soı epıdemıologıalyq jaǵdaıdyń turaqtanýyna baılanysty óńirlerde ınfeksıalyq tósek-oryndardy azaıtý jumysy júrip jatqanyn málimdedi. Tósek-oryn qory barlyǵy 12 211 tósekke qysqarǵan.
