Aldymen prezident ákimshiliginiń jetekshisi Igor Sergienko sulap túsken-tin, artynan Batkanyń baspasóz hatshysy Nataliia Eismont ta indettiń tyrnaǵyna ilikkeni belgili boldy.
Jumysqa at izin salýdy qoiǵan Eismont virýs juqtyrǵanyn habarlaýǵa júregi daýalamai júrgen kórinedi.
Lýkashenkonyń mańaiyndaǵy sheneýnikterdiń jappai virýs juqtyryp jatqany álemjelide tarap ketken telefon áńgimesinen keiin áshkere boldy.
Belarýs qaýipsizdik komitetiniń tórt qyzmetkeri Eismont bastaǵan Batkanyń senimdi serikteriniń kúbirlesýinen kúdiktenip, tyń tyńdaidy. Telefondaǵy áńgime artynsha álemjelige tarap ketedi.
Lýkashenkonyń kómekshisi Nikolai Latyshenkoǵa habarlasyp, muńyn shaqqan Eimont óziniń dám, iis sezbei qalǵanyn aitady.
«Men bilsem bul koronavirýstyń belgisi. Bastyǵyma aitshy, jumysqa áli bara almaimyn. Álsizdik bar, basymdy áreń kóterip júrmin. Bul pálekettiń kimnen juqqanyn da bilemin. Túneýkúngi jiynda Sergienkonyń tap janynda otyrǵanmyn», – deidi Eismont.
Aita ketelik Lýkashenko ákimshiliginiń basshysy Igor Sergienko ázir hal ústinde, jaǵdaiy aýyrlaǵan ony jasandy tyny salý apparatyna qosqan.
Álgi jiynǵa Lýkashenko da qatysqan bolatyn. Telefon áńgimesinen belgili bolǵandai Sergienko bastyǵy jaqtyrmaityn bolǵandyqtan jiynǵa maskasyz kelgen.
«Lýkashkenkonyń tóńiregindegiler virýs týraly ashyq aita bermeidi. Tósek tartyp jatyp qalsa da, tis jarmaidy. Virýstyń adam talǵamaitynyn, talai sheneýnik osy indettiń quryǵyna iligip, ana ómirge attanyp ketkenin moiyndaǵysy joq. Bári de Batkanyń kóńili úshin…», – deidi Nexta telegram kanaly.
Belarýster óz arasynda: «Bizdiń shendiler aýyrmaidy, aýyrsa da indetten buryn, Lýkashenkonyń qaharynan qorqady» deidi.
Belarýs saiasattanýshysy Valerii Karbalevichtiń pikirinshe janyndaǵy adamdar indet juqtyrǵanyn estise Batkanyń qabaǵy kirjie qalady eken. Koronavirýs juqtyrǵan sheneýniktiń prezident komandasyna qaita qosylýy da neǵaibyl.
«Prezident ákimshiliginiń basshysy álgi jiynǵa shatqaiaqtap ázer keldi. Endi Eismont aýyryp jatyr. Batka bilip qoimasyn dep, jany shyǵyp barady. Bastyǵynyń qas-qabaǵyn baǵýdan basqa bileri joq bulardy aiap qajet emes», – deidi ol.
Aita ketelik Lýkashenkonyń ózi kúni keshegi deiin koronavirýske senbei keldi ári resmi jiyndarda maska taǵýǵa tyiym saldy.
Karbalevichtiń aitýynsha bul barlyq diktatorǵa tán dert. Olar qateleskenin eshqashan, eshbir ýaqytta moiyndamaidy.
