الدىمەن پرەزيدەنت اكىمشىلىگىنىڭ جەتەكشىسى يگور سەرگيەنكو سۇلاپ تۇسكەن-تىن، ارتىنان باتكانىڭ باسپا ءسوز حاتشىسى ناتاليا ەيسمونت تا ىندەتتىڭ تىرناعىنا ىلىككەنى بەلگىلى بولدى.
جۇمىسقا ات ءىزىن سالۋدى قويعان ەيسمونت ۆيرۋس جۇقتىرعانىن حابارلاۋعا جۇرەگى داۋالاماي جۇرگەن كورىنەدى.
لۋكاشەنكونىڭ ماڭايىنداعى شەنەۋنىكتەردىڭ جاپپاي ۆيرۋس جۇقتىرىپ جاتقانى الەمجەلىدە تاراپ كەتكەن تەلەفون اڭگىمەسىنەن كەيىن اشكەرە بولدى.
بەلارۋس قاۋىپسىزدىك كوميتەتىنىڭ ءتورت قىزمەتكەرى ەيسمونت باستاعان باتكانىڭ سەنىمدى سەرىكتەرىنىڭ كۇبىرلەسۋىنەن كۇدىكتەنىپ، تىڭ تىڭدايدى. تەلەفونداعى اڭگىمە ارتىنشا الەمجەلىگە تاراپ كەتەدى.
لۋكاشەنكونىڭ كومەكشىسى نيكولاي لاتىشەنكوعا حابارلاسىپ، مۇڭىن شاققان ەيمونت ءوزىنىڭ ءدام، ءيىس سەزبەي قالعانىن ايتادى.
«مەن بىلسەم بۇل كوروناۆيرۋستىڭ بەلگىسى. باستىعىما ايتشى، جۇمىسقا ءالى بارا المايمىن. السىزدىك بار، باسىمدى ارەڭ كوتەرىپ ءجۇرمىن. بۇل پالەكەتتىڭ كىمنەن جۇققانىن دا بىلەمىن. تۇنەۋكۇنگى جيىندا سەرگيەنكونىڭ تاپ جانىندا وتىرعانمىن»، – دەيدى ەيسمونت.
ايتا كەتەلىك لۋكاشەنكو اكىمشىلىگىنىڭ باسشىسى يگور سەرگيەنكو ءازىر حال ۇستىندە، جاعدايى اۋىرلاعان ونى جاساندى تىنى سالۋ اپپاراتىنا قوسقان.
الگى جيىنعا لۋكاشەنكو دا قاتىسقان بولاتىن. تەلەفون اڭگىمەسىنەن بەلگىلى بولعانداي سەرگيەنكو باستىعى جاقتىرمايتىن بولعاندىقتان جيىنعا ماسكاسىز كەلگەن.
«لۋكاشكەنكونىڭ توڭىرەگىندەگىلەر ۆيرۋس تۋرالى اشىق ايتا بەرمەيدى. توسەك تارتىپ جاتىپ قالسا دا، ءتىس جارمايدى. ۆيرۋستىڭ ادام تالعامايتىنىن، تالاي شەنەۋنىك وسى ىندەتتىڭ قۇرىعىنا ىلىگىپ، انا ومىرگە اتتانىپ كەتكەنىن مويىنداعىسى جوق. ءبارى دە باتكانىڭ كوڭىلى ءۇشىن…»، – دەيدى Nexta تەلەگرام كانالى.
بەلارۋستەر ءوز اراسىندا: «ءبىزدىڭ شەندىلەر اۋىرمايدى، اۋىرسا دا ىندەتتەن بۇرىن، لۋكاشەنكونىڭ قاھارىنان قورقادى» دەيدى.
بەلارۋس ساياساتتانۋشىسى ۆالەريي كارباليەۆيچتىڭ پىكىرىنشە جانىنداعى ادامدار ىندەت جۇقتىرعانىن ەستىسە باتكانىڭ قاباعى كىرجيە قالادى ەكەن. كوروناۆيرۋس جۇقتىرعان شەنەۋنىكتىڭ پرەزيدەنت كومانداسىنا قايتا قوسىلۋى دا نەعايبىل.
«پرەزيدەنت اكىمشىلىگىنىڭ باسشىسى الگى جيىنعا شاتقاياقتاپ ازەر كەلدى. ەندى ەيسمونت اۋىرىپ جاتىر. باتكا ءبىلىپ قويماسىن دەپ، جانى شىعىپ بارادى. باستىعىنىڭ قاس-قاباعىن باعۋدان باسقا بىلەرى جوق بۇلاردى اياپ قاجەت ەمەس»، – دەيدى ول.
ايتا كەتەلىك لۋكاشەنكونىڭ ءوزى كۇنى كەشەگى دەيىن كوروناۆيرۋسكە سەنبەي كەلدى ءارى رەسمي جيىنداردا ماسكا تاعۋعا تىيىم سالدى.
كارباليەۆيچتىڭ ايتۋىنشا بۇل بارلىق ديكتاتورعا ءتان دەرت. ولار قاتەلەسكەنىن ەشقاشان، ەشبىر ۋاقىتتا مويىندامايدى.
