Korei azamaty Almatyda sheteldikterge arnalǵan seks-priton ashyp alypty
Jalǵa alynǵan jeke úide jezókshelerdiń pritonyn ashqan adam Ońtústik Koreianyń 47 jastaǵy azamaty bolyp shyqty. Ol JShS direktory eken. Politseilerdiń aitýynsha, ol úidi karaoke-bar retinde ashqan. Bul maqsatta kúdikti qalanyń qaq ortasynda záýlim úi jaldap, senimdi adamdarynan quralǵan kómekshilerin jumysqa qabyldaǵan. Bul "barda" tek sheteldikterge qyzmet kórsetilgen. Aqysy da shetel valiýtasynda tólenipti.
"Korei azamaty Qazaqstan azamattarynan quralǵan tobymen saqtyq jáne qaýipsizdik sharalaryn qatty qadaǵalaǵan. Ár adamnyń óz róli bolǵan. Máselen, Almaty oblysynyń 45 jastaǵy turǵyny JShS-da direktor retinde esepte bolyp, personaldyń jalaqysyn tóleýmen ainalysqan, sonymen qatar, JShS-nyń zań jáne qarjy máselelerin sheshken. Al Jambyl oblysynyń 51 jastaǵy týmasy "karaoke-barda" kúzetshi bolypty. Ol mekemeni kúzetip, tek tekserilgen adamdardy kirgizgen. Bul qylmystyq ortada 29 jastaǵy azamatsha bardyń ákimshisi retinde jazylsa da, intim qyzmetin usynatyndardyń kastingin ótkizgen. Mekemeniń ishinde áiel "madam" dep atalǵan. 20 jastaǵy azamatsha bolsa mekemeniń kassa qyzmetinde jumys istegen. Jedel jáne arnaiy sharalardy júrgizýdiń qorytyndysynda túsken málimet boiynsha, ol klientterden aqsha alǵan. Jeńil júristi qyzdardyń qyzmet kórsetý baǵasy 100-300 dollar aralyǵynda", - dep habarlady Almaty qalalyq IID-niń Uiymdasqan qylmystyq toppen kúres basqarmasynyń basshysy Erlan Oralbekov.
Osy derek boiynsha QR Qylmystyq kodeksiniń 309-babynyń 2-bóligi boiynsha Almaty qalalyq IID Tergeý basqarmasy tergeý júrgizip jatyr. Ońtústik Koreia azamaty Qylmystyq kodekstiń 128-babynyń tártibinde ýaqytsha ustaý izoliatoryna qamaldy.
