جالعا الىنعان جەكە ۇيدە جەزوكشەلەردىڭ پريتونىن اشقان ادام وڭتۇستىك كورەيانىڭ 47 جاستاعى ازاماتى بولىپ شىقتى. ول ج ش س ديرەكتورى ەكەن. پوليسەيلەردىڭ ايتۋىنشا، ول ءۇيدى كاراوكە-بار رەتىندە اشقان. بۇل ماقساتتا كۇدىكتى قالانىڭ قاق ورتاسىندا ءزاۋلىم ءۇي جالداپ، سەنىمدى ادامدارىنان قۇرالعان كومەكشىلەرىن جۇمىسقا قابىلداعان. بۇل "باردا" تەك شەتەلدىكتەرگە قىزمەت كورسەتىلگەن. اقىسى دا شەتەل ۆاليۋتاسىندا تولەنىپتى.
"كورەي ازاماتى قازاقستان ازاماتتارىنان قۇرالعان توبىمەن ساقتىق جانە قاۋىپسىزدىك شارالارىن قاتتى قاداعالاعان. ءار ادامنىڭ ءوز ءرولى بولعان. ماسەلەن، الماتى وبلىسىنىڭ 45 جاستاعى تۇرعىنى جشس-دا ديرەكتور رەتىندە ەسەپتە بولىپ، پەرسونالدىڭ جالاقىسىن تولەۋمەن اينالىسقان، سونىمەن قاتار، جشس-نىڭ زاڭ جانە قارجى ماسەلەلەرىن شەشكەن. ال جامبىل وبلىسىنىڭ 51 جاستاعى تۋماسى "كاراوكە-باردا" كۇزەتشى بولىپتى. ول مەكەمەنى كۇزەتىپ، تەك تەكسەرىلگەن ادامداردى كىرگىزگەن. بۇل قىلمىستىق ورتادا 29 جاستاعى ازاماتشا باردىڭ اكىمشىسى رەتىندە جازىلسا دا، ينتيم قىزمەتىن ۇسىناتىنداردىڭ كاستينگىن وتكىزگەن. مەكەمەنىڭ ىشىندە ايەل "مادام" دەپ اتالعان. 20 جاستاعى ازاماتشا بولسا مەكەمەنىڭ كاسسا قىزمەتىندە جۇمىس ىستەگەن. جەدەل جانە ارنايى شارالاردى جۇرگىزۋدىڭ قورىتىندىسىندا تۇسكەن مالىمەت بويىنشا، ول كليەنتتەردەن اقشا العان. جەڭىل ءجۇرىستى قىزداردىڭ قىزمەت كورسەتۋ باعاسى 100-300 دوللار ارالىعىندا"، - دەپ حابارلادى الماتى قالالىق ءىىد-نىڭ ۇيىمداسقان قىلمىستىق توپپەن كۇرەس باسقارماسىنىڭ باسشىسى ەرلان ورالبەكوۆ.
وسى دەرەك بويىنشا ق ر قىلمىستىق كودەكسىنىڭ 309-بابىنىڭ 2-بولىگى بويىنشا الماتى قالالىق ءىىد تەرگەۋ باسقارماسى تەرگەۋ جۇرگىزىپ جاتىر. وڭتۇستىك كورەيا ازاماتى قىلمىستىق كودەكستىڭ 128-بابىنىڭ تارتىبىندە ۋاقىتشا ۇستاۋ يزولياتورىنا قامالدى.
