Eńbek jáne halyqty áleýmettik qorǵaý ministri Svetlana Jaqypova Májiliste "konvertpen" beriletin jalaqymen qalai kúresýge nietti ekendikterin aitty. Onyń aitýynsha, elimizde joǵary bilikti mamandardyń ózine qaǵaz júzinde nebári 85 myń teńge taǵaiyndalatynyn, al qalǵan jalaqysyn salyqty az tóleý úshin konvertpen beriletin jaǵdailar bar, dep habarlaidy Dalanews.kz.
"Jumys berýshi resmi jalaqyny 85 myń teńge dep jazady, al qalǵanyn "konvertpen" beredi. Buǵan jol bermeý úshin biz eńbek qatynastary deklaratsiialanýy kerektigin aityp júrmiz. Jalaqy memleket tarapynan retteletin Singapýr, Shvetsiia turǵysyndaǵy halyqaralyq tájiribe osyny kórsetedi", - dedi ministr búgin Májilis otyrysynda.
Eńbek jáne halyqty áleýmettik qorǵaý ministrligi eńbek qatynastaryn baqylaýdy qatańdatýǵa baǵyttalǵan Eńbek kodeksine ózgerister engizýge bastamashylyq jasaidy. Jańa tásil tek jaldaý faktilerin ǵana emes, sonymen qatar atqarylǵan jumysqa taǵaiyndalatyn syiaqynyń tolyq somasyn mindetti túrde deklaratsiialaýdy qamtidy. Bul shara jalaqynyń bir bóligin "konvertpen" berý syndy salyqtyq jáne áleýmettik aýdarymdardy azaityp, áleýmettik qorǵaý júiesiniń qarjylyq turaqtylyǵyna nuqsan keltiretin keń taralǵan tájiribeni joiýy kerek.
Ministrlik salalar boiynsha eńbekaqynyń birkelki bolmaýyna erekshe nazar aýdarady.
Svetlana Jaqypovanyń aitýynsha, qazir bir deńgeidegi mamandar arasyndaǵy tabys aiyrmashylyǵy birneshe esege jetýi múmkin: bireýi 1 million teńgeden astam, al ekinshisi — nebári 400 nemese,tipti 220 myń teńge alýy múmkin.
"Biz búginderi áleýmettik seriktesterimizben kelissózder júrgizip jatyrmyz jáne jaqyn arada talqy úshin ústel basyna jinalamyz. Salalyq kelisimder boiynsha biz eńbekaqy tóleý sharttaryn talqylaityn bolamyz. Óitkeni taý-ken metallýrgiia keshenin mysalǵa keltirsek te, ondaǵy jalaqydaǵy ózgeristerdi kóre alasyzdar", - dep túsindirdi Svetlana Jaqypova.
Ministr reformanyń negizgi maqsaty barlyq jumys berýshiler úshin oiyn erejelerin teńestirý jáne jumyspen qamtýdyń ashyq jaǵdailaryn qamtamasyz etý ekenin atap ótti. Mindetti deklaratsiialaý, Eńbek ministrliginiń pikirinshe, elimizde neǵurlym ádil jáne ornyqty eńbekaqy tóleý júiesin qurýǵa jasalǵan qadam bolýy tiis. Bul bastamany Úkimet pen Prezident Ákimshiligi qoldap qoidy. Jaqyn arada zań jobasy jumys berýshiler men kásipodaqtardyń qatysýymen keńinen talqylanatyn bolady.
