Qazaqstan Konstitýtsiiasyn jańartý aiasynda Negizgi zańnyń 77 baby qaita qaralyp, mátinniń 84%-y ózgeredi, dep habarlaidy Dalanews.kz.
Bul týraly Konstitýtsiialyq sot tóraǵasynyń orynbasary Baqyt Nurmuhanov Konstitýtsiialyq reforma jónindegi komissiia otyrysynda málimdedi.
Onyń aitýynsha, azamattardan, saiasi partiialardan, qoǵamdyq uiymdar men sarapshylardan túsken barlyq usynystar eskerilip, Konstitýtsiiaǵa engiziletin túzetýlerdiń biryńǵai jobasy ázirlengen. Jańa redaktsiiada Kirispe, 11 bólim jáne 104 bap bolady. Eki jańa bólim engiziledi: «Halyq keńesi» jáne «Konstitýtsiiaǵa ózgerister men tolyqtyrýlar engizý». Taǵy tórt bólimniń ataýy ózgeredi.
Baqyt Nurmuhanov bul ózgerister Konstitýtsiianyń tujyrymdamalyq negizin túbegeili jańartatynyn atap ótti.
«Usynylǵan túzetýler adam men azamattyń quqyqtary men bostandyqtaryn qorǵaý kepildikterin kúsheitedi. Prezidenttik basqarý nysany saqtala otyryp, birtutas memlekettik biliktiń uiymdastyrylýy aitarlyqtai ózgeredi», dedi ol.
Jobada birpalataly Parlament modeli engiziledi, azamattardyń memlekettik basqarýǵa qatysý tetikteri keńeiedi, quqyq qorǵaý mehanizmderiniń tiimdiligi artady jáne Konstitýtsiialyq sottyń róli kúsheiedi.
Sondai-aq Konstitýtsiianyń kirispe bólimi tolyq jańaryp, neke men otbasy qundylyqtary konstitýtsiialyq deńgeide bekitiledi. Halyq keńesi barlyq azamattyń múddesin bildiretin institýt retinde aiqyndalady. Al memlekettiń birtutastyǵy, aýmaqtyń bólinbeitini men qol suǵylmaityny týraly norma ózgerissiz qalady.
Jiynda qujatpen zańgerler men lingvisterden quralǵan jumys toptary da qatar jumys istep jatqany aityldy. Maqsat – quqyqtyq normalardy dál ári ekiushty maǵynasyz tujyrymdaý.
Komissiia jumysyna óńir basshysy Nurlybek Nálibaev ta qatysyp, jekelegen sektsiialyq talqylaýlarǵa atsalysyp júr.
