قازاقستان كونستيتۋسياسىن جاڭارتۋ اياسىندا نەگىزگى زاڭنىڭ 77 بابى قايتا قارالىپ، ءماتىننىڭ 84%-ى وزگەرەدى، دەپ حابارلايدى Dalanews.kz.

بۇل تۋرالى كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ كونستيتۋسيالىق رەفورما جونىندەگى كوميسسيا وتىرىسىندا مالىمدەدى.

ونىڭ ايتۋىنشا، ازاماتتاردان، ساياسي پارتيالاردان، قوعامدىق ۇيىمدار مەن ساراپشىلاردان تۇسكەن بارلىق ۇسىنىستار ەسكەرىلىپ، كونستيتۋسياعا ەنگىزىلەتىن تۇزەتۋلەردىڭ ءبىرىڭعاي جوباسى ازىرلەنگەن. جاڭا رەداكسيادا كىرىسپە، 11 ءبولىم جانە 104 باپ بولادى. ەكى جاڭا ءبولىم ەنگىزىلەدى: «حالىق كەڭەسى» جانە «كونستيتۋسياعا وزگەرىستەر مەن تولىقتىرۋلار ەنگىزۋ». تاعى ءتورت ءبولىمنىڭ اتاۋى وزگەرەدى.

باقىت نۇرمۇحانوۆ بۇل وزگەرىستەر كونستيتۋسيانىڭ تۇجىرىمدامالىق نەگىزىن تۇبەگەيلى جاڭارتاتىنىن اتاپ ءوتتى.

«ۇسىنىلعان تۇزەتۋلەر ادام مەن ازاماتتىڭ قۇقىقتارى مەن بوستاندىقتارىن قورعاۋ كەپىلدىكتەرىن كۇشەيتەدى. پرەزيدەنتتىك باسقارۋ نىسانى ساقتالا وتىرىپ، ءبىرتۇتاس مەملەكەتتىك بيلىكتىڭ ۇيىمداستىرىلۋى ايتارلىقتاي وزگەرەدى»، دەدى ول.

جوبادا ءبىرپالاتالى پارلامەنت مودەلى ەنگىزىلەدى، ازاماتتاردىڭ مەملەكەتتىك باسقارۋعا قاتىسۋ تەتىكتەرى كەڭەيەدى، قۇقىق قورعاۋ مەحانيزمدەرىنىڭ تيىمدىلىگى ارتادى جانە كونستيتۋسيالىق سوتتىڭ ءرولى كۇشەيەدى.

سونداي-اق كونستيتۋسيانىڭ كىرىسپە ءبولىمى تولىق جاڭارىپ، نەكە مەن وتباسى قۇندىلىقتارى كونستيتۋسيالىق دەڭگەيدە بەكىتىلەدى. حالىق كەڭەسى بارلىق ازاماتتىڭ مۇددەسىن بىلدىرەتىن ينستيتۋت رەتىندە ايقىندالادى. ال مەملەكەتتىڭ ءبىرتۇتاستىعى، اۋماقتىڭ بولىنبەيتىنى مەن قول سۇعىلمايتىنى تۋرالى نورما وزگەرىسسىز قالادى.

جيىندا قۇجاتپەن زاڭگەرلەر مەن لينگۆيستەردەن قۇرالعان جۇمىس توپتارى دا قاتار جۇمىس ىستەپ جاتقانى ايتىلدى. ماقسات – قۇقىقتىق نورمالاردى ءدال ءارى ەكىۇشتى ماعىناسىز تۇجىرىمداۋ.

كوميسسيا جۇمىسىنا ءوڭىر باسشىسى نۇرلىبەك نالىبايەۆ تا قاتىسىپ، جەكەلەگەن سەكسيالىق تالقىلاۋلارعا اتسالىسىپ ءجۇر.