Almaty oblysynyń ákimi Marat Sultanǵaziev "Sun City" turǵyn úi kesheninde 85 otbasyǵa jańa páter kiltterin tabys etti. Baspana 10 jyldan astam ýaqyt úi kezeginde turǵan otbasylarǵa berildi.
Páterler Konstitýtsiia kúni qarsańynda qalanyń kommýnaldyq turǵyn úi qorynan baspana satyp alý baǵdarlamasy sheńberinde tabystaldy. Bul páterler "KazSMU" JShS júzege asyrǵan 360 páterli keshennen satyp alyndy.
Sharaǵa Almaty oblysynyń ákimi Marat Eleýsizuly qatysyp, turǵyndardy quttyqtady. Ol: "Turǵyn úimen qamtamasyz etý – memlekettik áleýmettik saiasattaǵy basymdyq. Turǵyn úi máselesine qatysty jaǵdaidy túbegeili ózgertý kerek. Bul suraq árdaiym jiti nazarda bolady", - dep el Prezidenti Qasym-Jomart Toqaev baspana máselesimen qamtýǵa basa nazar aýdarǵan.
Osy baǵytta Almaty oblysynda da belsendi jumystar júrgizilip jatyr. Aǵymdaǵy jyly áleýmettik osal toptarǵa arnalǵan 1304 páterdi satyp alý josparlanǵan. Onyń 55-i búginde satyp alyndy. Oblys ortalyǵynda qosymsha 145 páter satyp alynyp, áleýmettik osal topqa jatatyn azamattarǵa beriledi. Jalpy, oblys boiynsha 61 kóppáterli turǵyn úi (1618 páter) qurylysy júrgizilip jatyr. Jyl sońyna deiin 3 myńǵa jýyq oblys turǵyny jańa baspanaǵa ie bolady dep kútilýde", - dedi Marat Eleýsizuly.
Jańa páterge ie bolǵandardyń biri - Anar Almuratova. Kúmis alqa iegeri bes qyz, bir ul tárbielep otyr. Ol on jyldan beri Qonaev qalalyq aýrýhanasynda medbike bolyp jumys isteidi.
"Qonaevta turyp jatqanymyzǵa on jyl boldy. 2012 jyly kóship keldim. Áserimdi aita almaimyn, tolqyp turmyn, qýanyshtymyn. Konstitýtsiia kúni qarsańynda úi berip jatyr, balapandarymyz osy jerden sabaqqa barady. Eki bólmeli úi, 78 sharshy metr, ishi úlken", - dedi Anar Almuratova.
"Sun City" turǵyn úi kesheni qalanyń jaily ári qolaily bóliginde ornalasqan. Ǵimarattyń qurylysy eki jyl buryn bastalyp, biyl paidalanýǵa berildi. 12 qabatty nysannyń aýlasy tolyq abattandyrylǵan. Balalarǵa arnalǵan sporttyq, oiyn-saýyq alańdary da ornatylypty.
"Qonaev qalasynda baspana kezeginde 1834 adam tur. Olardyń arasynda kópbalaly analar, soǵys ardagerleri, jetim balalar jáne múgedekter bar. Jyl sońyna deiin 165 páterdi Úkimet tarapynan berý josparlanyp otyr", - dedi Qonaev qalasynyń ákimi Ashat Berdihanov.
