الماتى وبلىسىنىڭ اكىمى مارات سۇلتانعازييەۆ "Sun City" تۇرعىن ءۇي كەشەنىندە 85 وتباسىعا جاڭا پاتەر كىلتتەرىن تابىس ەتتى. باسپانا 10 جىلدان استام ۋاقىت ءۇي كەزەگىندە تۇرعان وتباسىلارعا بەرىلدى.

پاتەرلەر كونستيتۋسيا كۇنى قارساڭىندا قالانىڭ كوممۋنالدىق تۇرعىن ءۇي قورىنان باسپانا ساتىپ الۋ باعدارلاماسى شەڭبەرىندە تابىستالدى. بۇل پاتەرلەر "KazSMU" ج ش س جۇزەگە اسىرعان 360 پاتەرلى كەشەننەن ساتىپ الىندى.

شاراعا الماتى وبلىسىنىڭ اكىمى مارات ەلەۋسىز ۇلى قاتىسىپ، تۇرعىنداردى قۇتتىقتادى. ول: "تۇرعىن ۇيمەن قامتاماسىز ەتۋ – مەملەكەتتىك الەۋمەتتىك ساياساتتاعى باسىمدىق. تۇرعىن ءۇي ماسەلەسىنە قاتىستى جاعدايدى تۇبەگەيلى وزگەرتۋ كەرەك. بۇل سۇراق ءاردايىم ءجىتى نازاردا بولادى"، - دەپ ەل پرەزيدەنتى قاسىم-جومارت توقايەۆ باسپانا ماسەلەسىمەن قامتۋعا باسا نازار اۋدارعان.

وسى باعىتتا الماتى وبلىسىندا دا بەلسەندى جۇمىستار جۇرگىزىلىپ جاتىر. اعىمداعى جىلى الەۋمەتتىك وسال توپتارعا ارنالعان 1304 پاتەردى ساتىپ الۋ جوسپارلانعان. ونىڭ 55ء-ى بۇگىندە ساتىپ الىندى. وبلىس ورتالىعىندا قوسىمشا 145 پاتەر ساتىپ الىنىپ، الەۋمەتتىك وسال توپقا جاتاتىن ازاماتتارعا بەرىلەدى. جالپى، وبلىس بويىنشا 61 كوپپاتەرلى تۇرعىن ءۇي (1618 پاتەر) قۇرىلىسى جۇرگىزىلىپ جاتىر. جىل سوڭىنا دەيىن 3 مىڭعا جۋىق وبلىس تۇرعىنى جاڭا باسپاناعا يە بولادى دەپ كۇتىلۋدە"، - دەدى مارات ەلەۋسىز ۇلى.

جاڭا پاتەرگە يە بولعانداردىڭ ءبىرى - انار المۇراتوۆا. كۇمىس القا يەگەرى بەس قىز، ءبىر ۇل تاربيەلەپ وتىر. ول ون جىلدان بەرى قونايەۆ قالالىق اۋرۋحاناسىندا مەدبيكە بولىپ جۇمىس ىستەيدى.

"قونايەۆتا تۇرىپ جاتقانىمىزعا ون جىل بولدى. 2012 جىلى كوشىپ كەلدىم. اسەرىمدى ايتا المايمىن، تولقىپ تۇرمىن، قۋانىشتىمىن. كونستيتۋسيا كۇنى قارساڭىندا ءۇي بەرىپ جاتىر، بالاپاندارىمىز وسى جەردەن ساباققا بارادى. ەكى بولمەلى ءۇي، 78 شارشى مەتر، ءىشى ۇلكەن"، - دەدى انار المۇراتوۆا.

"Sun City" تۇرعىن ءۇي كەشەنى قالانىڭ جايلى ءارى قولايلى بولىگىندە ورنالاسقان. عيماراتتىڭ قۇرىلىسى ەكى جىل بۇرىن باستالىپ، بيىل پايدالانۋعا بەرىلدى. 12 قاباتتى نىساننىڭ اۋلاسى تولىق اباتتاندىرىلعان. بالالارعا ارنالعان سپورتتىق، ويىن-ساۋىق الاڭدارى دا ورناتىلىپتى.

"قونايەۆ قالاسىندا باسپانا كەزەگىندە 1834 ادام تۇر. ولاردىڭ اراسىندا كوپبالالى انالار، سوعىس ارداگەرلەرى، جەتىم بالالار جانە مۇگەدەكتەر بار. جىل سوڭىنا دەيىن 165 پاتەردى ۇكىمەت تاراپىنان بەرۋ جوسپارلانىپ وتىر"، - دەدى قونايەۆ قالاسىنىڭ اكىمى اسحات بەردىحانوۆ.